सञ्चारमाध्यमलाई स्वास्थ्य मन्त्रालयको आग्रह : मास्क प्रयोग नगर्ने व्यक्तिका समाचार बन्द गरौं
प्रकाशित मिति : बैशाख १२, २०७८ आईतबार
स्वास्थ्य मन्त्रालयले कोरोना संक्रमण रोकथामका लागि अबका दिनमा सञ्चारमाध्यम झन् बढी संवेदनशील हुँदै खबरदारी गर्नुपर्ने बताएको छ।
मन्त्रालयले आमसञ्चारका माध्यममा समाचार पढ्दा, अन्तर्वार्ता लिँदा वा कुनै कार्यक्रमका समाचार बनाउँदा मास्कको प्रयोग अनिवार्य गर्न आग्रह गरेको छ। मन्त्रालयका सहप्रवक्ता डा समीरकुमार अधिकारीले आइतबार सार्वजनिक सूचना जारी गर्दै मास्कको प्रयोग नगर्ने व्यक्तिका समाचार सूचनालाई निरुत्साहित गर्न र बन्द गर्न पनि आग्रह गरेका छन्।
संक्रमण रोकथामका लागि नेपाल सरकारले तोकेका मापदण्ड निर्विकल्प उपाय भएको उल्लेख गर्दै मन्त्रालयले संक्रमणको चक्रलाई रोक्न नसकिए र यही गतिमा फैलँदै गए केही दिनमै अस्पतालमा बिरामी राख्ने ठाउँसम्म नहुनेतर्फ पनि सचेत गराएको छ।
मन्त्रालयले सबैले संक्रमणको फैलावटलाई रोक्ने गरी जिम्मेवार बन्न र बनाउन अत्यावश्यक रहेको सूचनामा उल्लेख गरेको छ।
‘व्यक्ति व्यक्तिले निर्वाह गर्नसक्ने भूमिबाट कसैलाई विचलित हुन नदेऔं, खबरदारी गरौं, आफूले अरु सबैलाई संक्रमणको आशंकामा राखेर मास्क लगाउने, भौतिक दूरी कायम गर्ने र हातको सरसफाइमा ध्यान दिने गरौं,’ सूचनामा भनिएको छ।
यस्तै,सार्वजनिक समारोह र सार्वजनिक स्थलमा कार्यक्रम नगर्न, नगराउन पनि समाजका अगुवालाई अपिल गरिएको छ।
छिमेकी देशमा कोरोनाले स्वास्थ्य सेवा प्रवाह प्रणाली तहसनहस बनाएको र देशका विभिन्न स्थानमा उस्तै किसिमका दुःखद अवस्थाआइसकेको देख्दादेख्दै पनि सबैले संक्रमण रोकथाम गर्न सक्ने भूमिकाहरु निर्वाह नगरेकोप्रति पनि मन्त्रालयले औंल्याएको छ।