एमालेले तोक्यो नेताहरुलाई जिम्मेवारी, को–कहाँ? (सूचीसहित)
प्रकाशित मिति : बैशाख १०, २०७८ शुक्रबार
नेकपा एमालेले नेताहरुलाई विभिन्न जिम्मेवारी तोकेको छ। शुक्रबार बसेको महाधिवेशन आयोजक कमिटीको बैठकले विभिन्न जिम्मेवारी तोकेको हो।
अध्यक्ष केपी ओलीले पार्टी स्कुल विभागको प्रमुखको जिम्मेवारी लिएका छन् भने महासचिव इश्वर पोखरेलले केन्द्रीय कार्यालय प्रमुख र उपत्यका विशेष कमिटी इन्चार्जको जिम्मेवारी लिएका छन्। प्रवक्ता तथा प्रचार विभाग प्रमुखको जिम्मेवारी प्रदीप ज्ञवालीलाई दिइएको छ।
यस्तै, निर्वाचन विभाग प्रमुखमा अग्नि खरेल, सहकारी तथा गरिबीनिवारण विभाग प्रमुखमा कमलप्रसाद चौलागाईं, स्वास्थ्य तथा जनसंख्या विभाग प्रमुखमा खगराज अधिकारी, अनेरास्ववियु इन्चार्जमा खिमलाल भट्टराई, जनसांस्कृतिक महासंघ इन्चार्जमा खगेन्द्र राई, अखिल नेपाल महिला संघ इन्चार्जमा गोमा देवकोटा, श्रम तथा रोजगार विभाग प्रमुखमा गौरीशंकर चौधरी, संगठन विभागमा विष्णु पौडेल, निर्वाचन विभागमा विष्णु रिमाल, कानुन विभागमा शिवमाया तुम्वाहाम्फे, संसदीय विभागमा सुवास नेम्वाङ तोकिएका छन्।
युवासंघको जिम्मेवारी महेश बस्नेत र प्रेस चौतारीको जिम्मेवारी सूर्य थापालाई दिइएको छ।
यस्तै, केन्द्रीय कार्यालय सचिवको जिम्मेवारी सांसद शेरबहादुर तामाङलाई दिएको छ। यसअघिका कार्यालय सचिव इश्वरी रिजाललाई भने स्कुल विभागका सचिवको जिम्मेवारी दिइएको छ।
