केपी ओली र माधव नेपालबीच २ घण्टा ‘वान टु वान’ भेटवार्ता, ओलीले गरे बालुवाटारमा ब्रिफिङ
प्रकाशित मिति : बैशाख ८, २०७८ बुधबार
लामो समयदेखि चिसिएको सम्बन्धलाई केही तातो बनाउँदै सत्तारुढ नेकपा एमालेका अध्यक्ष एवं प्रधानमन्त्री केपी ओली र वरिष्ठ नेता माधवकुमार नेपालबीच २ घण्टा ‘वान टु वान’ भेटवार्ता भएको छ। दुई शीर्ष नेताबीच काठमाडौंको मेरियट होटलको ९०१ नम्बर कोठामा भेटवार्ता भएको हो।
भेटवार्तामा के कुराकानी भयो भन्ने सार्वजनिक नगरिए पनि एमाले औपचारिक रुपमा फुटको संघारमा पुगेका बेला दुई नेताबीच भएको भेटलाई अर्थपूर्ण रुपमा लिइएको छ।
नेता नेपाल ‘साथीहरुसँग छलफल गर्नै बाँकी छ। अहिले केही बोल्दिनँ’ भनेर बाहिरिएका थिए। होटल परिसरमा भेटिएका प्रधानमन्त्री ओलीका आर्थिक सल्लाहकार मोतीलाल दुगडले भेट सकारात्मक भएको संकेत गर्दै भने, ‘दुवै नेता बाहिरिने क्रममा प्रसन्न मुद्रामा हुनुहुन्थ्यो। राम्रो भएको हुनुपर्छ।’
नेपालसहित यसअघि निलम्बन गरिएका ४ नेतालाई २ दिनको अन्तिम समय र २७ अन्य संघीय सांसदलाई ३ दिनको स्पष्टीकरण सोधिएपछि झनै पेचिलो बनेको एमालेभित्रको विवाद दुवै नेताबीचको भेटले मत्थर हुने आशा गरिएको छ।
बुधवारै नेता नेपालले बुद्धनगरमा आफूसमूहका स्थायी कमिटी सदस्यसँग छलफल गरेका थिए भने सो समूहका नेता योगेश भट्टराई ओलीलाई बालुवाटारमा भेटेर फर्किएका थिए।
बुद्धनगरको भेटलगत्तै नेपाल र झलनाथ खनालले नक्सालकै एक होटलमा बामदेव गौतमसँग छलफल गरेका थिए। उक्त भेटलगत्तै नेपाल ओलीलाई भेट्न मेरियट होटल पुगेका थिए।
बालुवाटारमा ब्रिफिङ गरे ओलीले
वरिष्ठ नेता नेपालसँगको भेटबारे ओलीले बुधबार साँझ नै आफूपक्षीय नेताहरुलाई ब्रिफिङ गरेका थिए। उनले नेताहरुलाई सुझाव दिन पनि आग्रह गरेका थिए।