उकालो लाग्दै कोरोना : २४ घण्टामा २३५१ संक्रमित, काठमाडौंमा मात्र ७८६ जनामा संक्रमण
प्रकाशित मिति : बैशाख ८, २०७८ बुधबार
छिमेकी मुलुक भारतमा दैनिक ३ लाख संक्रमित थपिइरहेका बेला नेपालमा पनि कोरोनाको दोस्रो लहर तीव्र हुन थालेको छ। पछिल्लो २४ घण्टामा देशभर थप २ हजार ३ सय ५१ जनामा कोभिड–१९ संक्रमण देखिएको छ।
यो अवधिमा काठमाडौंमा मात्रै ७ सय ८६ जनामा संक्रमण पुष्टि भएको छ। यस्तै, ललितपुरमा १ सय ८१ र भक्तपुरमा ८४ जनामा संक्रमण देखिएको छ।
२४ घण्टामा थप २८७ जना निको भएका छन्। निको हुने दर ९३.३ प्रतिशत पुगेको छ।
स्वास्थ्य तथा जनसंख्या मन्त्रालयका प्रवक्ता डा जागेश्वर गौतमका अनुसार ८ हजार ८४४ जनाको पीसीआर बिधिबाट परीक्षण गर्दा २ हजार २२० जना र ८०३ जनाको एन्टीजेन परीक्षण गर्दा १३१ जना गरी थप २ हजार ३५१ जनाको रिपोर्ट पोजेटिभ आएको थियो।
थप संक्रमितसँगै देशभर सक्रिय संक्रमितको संख्या १० हजार ५८२ पुगेको छ। क्वारेन्टिनमा ८६ जना छन्। आइसीयूमा १८० र भेन्टीलेटरमा ४७ जना उपचाररत छन्।
अत्यावश्यकबाहेक घरबाहिर ननिस्कन स्वास्थ्य मन्त्रालयकाे आग्रह
यसैबीच, स्वास्थ्य तथा जनसंख्या मन्त्रालयले अत्यवाश्यक कामबाहेक घर बाहिर ननिस्कन आग्रह गरेको छ। कोरोनाको संक्रमण दर अत्याधिक बढेकाले अत्यावश्यक कामबाहेक घर बाहिर ननिस्कन मन्त्रालयले आग्रह गरेको हो।
नियमित कोरोना ब्रिफिङका क्रममा मन्त्रालयका प्रवक्ता डा.जागेश्वर गौतमले कोरोना संक्रमणको जोखिम बढ्दै गएकाले बिनाकाम घर बाहिर ननिस्कन आग्रह गरेका छन्।
कोरोना संक्रमणको दर हरेक चार दिनमा दोब्बर हुँदै गएको मन्त्रालयले जनाएको छ।
‘संक्रमणको दर अत्यधिक बढ्दै गएको छ। आजमात्रै दुई हजार बढी संक्रमित थपिएका छन्,’ गौतमले भने,‘हाम्रो स्वास्थ्य संरचनाले धान्नै नसक्ने गरी संक्रमितको संख्या बढ्दै गइरहेको छ। अत्यावश्यक कामबाहेक घर बाहिर ननिस्कौं। सभा, सम्मेलन, जात्रा नगर्न आग्रह छ।’
स्वास्थ्य संरचनाले धान्न नसक्ने गरी संक्रमितको संख्या बढ्दै गइरहेको प्रवक्ता गौतमको भनाइ छ।
संक्रमणको जोखिम न्यूनीकरणका लागि जनस्वास्थ्यका मापदण्ड कडाइका साथ पालन गर्न उनले सबैलाई आग्रह गरेका छन्।