माओवादीले भन्यो–सरकारलाई समर्थन छैन, लेखेर दिनमात्र बाँकी छ
प्रकाशित मिति : बैशाख ७, २०७८ मंगलबार
नेकपा माओवादी केन्द्रले सरकारलाई दिएको समर्थन फिर्ता लिनेबारे मंगलबार पनि कुनै निर्णय गर्न सकेन। मंगलबार बसेको स्थायी कमिटी बैठकले सरकारबाट समर्थन फिर्ता लिने निर्णय गर्ने आँकलन गरिए पनि निर्णय नगरेकाे हाे।
बैठकपछि बोल्दै प्रवक्ता नारायणकाजी श्रेष्ठले समर्थन फिर्ता लिनेबारे छलफल भए पनि निर्णय नभएको बताए।
वर्तमान सरकारलाई आफूहरूको समर्थन नरहेको बताउँदै उनले केवल औपचारिक रूपमा लेखेर दिनमात्र बाँकी रहेको उल्लेख गरे।
‘अहिलेको सरकारलाई हाम्रो समर्थन छँदै छैन, केबल लेखेर दिनमात्र बाँकी छ,’ श्रेष्ठले भने,‘तर देशमा राजनीतिक अन्योलताको स्थिति सिर्जना नहोस्। संविधान र लोकतन्त्रमाथि खतरा उत्पन्न हुनेगरी चुनावको घोषणा हुने। तर, चुनाव नहुने स्थितितर्फ देश नधकेलियोस्। त्यसकारण हामी सुविचारी ढंगले कदम चाल्ने समयको बाटो कुरेर बसिरहेका छौं।’
उनले वर्तमान सरकारलाई विस्थापित गरेर नयाँ सरकार गठनका लागि आफूहरुले पहल गरिरहेको बताए।
संसदलाई प्रभावकारी बनाउनुपर्नेमा हठात् ढंगले अधिवेशन अन्त्य गरेर सरकारले अलोकतान्त्रिक, निरंकुश र असंवैधानिक कदम चालेको श्रेष्ठले बताए।