अविश्वास प्रस्तावमा हस्ताक्षर गरेको २ घण्टा नबित्दै मन्त्री ‘उपहार’


प्रकाशित मिति : बैशाख ६, २०७८ सोमबार

लुम्बिनी प्रदेशका मुख्यमन्त्री शंकर पोखरेलविरुद्ध सोमबार दर्ता भएको अविश्वास प्रस्ताव प्रदेशसभामा प्रक्रियामा जानुअगावै तुहिएको छ।

अविश्वास प्रस्तावमा हस्ताक्षर गर्ने जनता समाजवादी पार्टी (जसपा) का ३ सांसद मन्त्री बनेसँगै प्रस्ताव बीचैमा तुहिएको हो।

जसपा प्रदेशसभा सदस्य विजय यादव, सन्तोष पाण्डे, सुमन रायमाझी र कल्पना पाण्डेलाई मुख्यमन्त्री शंकर पोखरेलले प्रदेश सरकारका मन्त्री नियुक्त गरेका हुन्। तीमध्ये पाण्डेले भने अविश्वास प्रस्तावमा हस्ताक्षर गरेकी थिइनन्।

उनीहरुलाई सोमबारै प्रदेश प्रमुख धर्मनाथ यादवले पद तथा गोपनीयताको सपथ दिलाएका छन्।

सोमबार बिहान कांग्रेस, माओवादी केन्द्र र जसपाले संयुक्त रूपमा सरकारविरुद्ध अविश्वास प्रस्ताव दर्ता गराएका थिए।

जसमा माओवादी केन्द्रका १७, कांग्रेसका १९ र जसपाका ५ जना प्रदेशसभा सदस्यले हस्ताक्षर गरेका थिए र माओवादी केन्द्रका कुलप्रसाद केसीलाई नयाँ मुख्यमन्त्रीका लागि प्रस्ताव गरिएको थियो।

अविश्वास प्रस्ताव दर्ता भएपछि माओवादी केन्द्रका कुलबहादुर केसी र सुदर्शन बरालले मन्त्री पदबाट राजीनामा दिएका थिए।
८५ सदस्यीय लुम्बिनी प्रदेशसभामा नयाँ सरकार गठनका लागि ४३ सांसदको समर्थन आवश्यक पर्नेमा ४१ सांसदले हस्ताक्षर गरेको बताइएको थियो।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com