स्वास्थ्य मन्त्रालयको आग्रह : विद्यालय, रात्रि व्यवसायमा सहभागी नभइदिनुस्
प्रकाशित मिति : बैशाख २, २०७८ बिहीबार
स्वास्थ्य तथा जनसंख्या मन्त्रालयले कोरोना संक्रमण प्रभावका हिसाबले नेपालमा अबका दिन निकै चुनौतीपूर्ण हुनसक्ने बताएको छ।
बिहीबार एक अपिल जारी गर्दै मन्त्रालयले कोभिड संक्रमणबाट जोडिन संवेदनशील बनिदिन र जनस्वास्थ्यका मापदण्ड कडाइका साथ पालना गर्न र गराउन एवं ‘मेरो स्वास्थ्य मेरो जिम्मेवारी’ भन्ने बुझेर जिम्मेवार बन्न आग्रह गरेको छ।
मन्त्रालयले संक्रमणका हिसाबले १४ जिल्लालाई अति प्रभावित भनेर बर्गीकरण गरेको छ।जसमा काठमाडौं, ललितपुर, कास्की, रुपन्देही, चितवन, बाँके, पर्सा, भक्तपुर, कैलाली, मोरङ, दाङ, सुर्खेत, बारा र बाग्लुङ छन्।
ती जिल्लामा बढी भीडभाग हुने सबै क्षेत्र तथा सेवाहरु अविलम्ब बन्द गर्नुपर्ने अवस्था भए पनि विद्यालय, रात्री व्यवसाय, ७ बजेपछि सबै रेष्टुँरा तथा क्लब, खेलकुद, जीम, सार्वजनिक पुजाआजा तथा जात्रा, सभा, सम्मेलन, बैठक, भेला, सिनेमा हल, सपिङ मल, नाचघर, पार्टी प्यालेस, हेल्थ क्लब,स्वीमिङ पुललगायतका स्थानमा सहभागी नभइदिन आग्रह गरेको छ।
यस्तै, सबै अस्पतालले अनिवार्य रुपमा फिभर क्लिनिक सञ्चालन गर्न तथा कोभिड १९ परीक्षणका लागि नमुना संकलन तथा परीक्षणको व्यवस्थापन गर्न पनि मन्त्रालयले आग्रह गरेको छ।