गण्डकी प्रदेशका मुख्यमन्त्रीविरुद्ध अविश्वास प्रस्ताव दर्ता
प्रकाशित मिति : बैशाख २, २०७८ बिहीबार
गण्डकी प्रदेशका मुख्यमन्त्री पृथ्वीसुब्बा गुरुङविरुद्ध अविश्वास प्रस्ताव दर्ता भएको छ। प्रमुख प्रतिपक्षी दल नेपाली कांग्रेसको अगुवाइमा माओवादी केन्द्र, जनता समाजवादी पार्टी र राष्ट्रिय जनमोर्चाको सहयोगमा गुरुङविरुद्ध अविश्वास प्रस्ताव दर्ता भएको हो।
विपक्षी दलहरूले अविश्वास प्रस्ताव ल्याउन तयारी गरिरहेकै बेला गण्डकी सरकारको सिफारिसमा प्रदेश प्रमुख अमिक शेरचनले बुधबार मध्यरातमा अचानक अन्त्यको घोषणा गरेका थिए।
कांग्रेस, माओवादी केन्द्र र जसपाका सांसदहरूको हस्ताक्षरसहित विहीबार १.३५ मा प्रदेशसभा सचिवालयमा मुख्यमन्त्री गुरुङविरुद्ध अविश्वास प्रस्ताव दर्ता भएको हो।
अविश्वास प्रस्तावबारे जानकारी दिन आयोजित पत्रकार सम्मेलनमा नेपाली कांग्रेस संसदीय दलका नेता कृष्णचन्द्र नेपालीले प्रतिगमनका मतियारहरूलाई सरकारमा बस्ने अधिकार नरहेकाले गुरुङविरुद्ध अविश्वास प्रस्ताव दर्ता गरिएको जनाएका छन्।
गुरुङले लोकतान्त्रिक मूल्यमान्यताविपरित चोर बाटोबाट अधिवेशन अन्त्य गरेको उनले बताए। चोर बाटोबाट अधिवेशन अन्त्य गरिएकाले आफूहरूले विशेष अधिवेशनको माग गर्ने उनको भनाइ थियो। सरकारविरुद्ध आउने अविश्वास प्रस्तावको पक्षमा जनमोर्चाले सहयोग गर्ने आश्वासन दिएको नेपालीले जनाएका छन्।
अविश्वास प्रस्ताव पास भइसकेपछि तीन दल मिलेर सरकार बनाइने उनले विश्वास व्यक्त गरे।
यसअघि बुधवार साँझ बसेको मन्त्रिपरिषद बैठकले चालू अधिवेशन अन्त्य गर्न प्रदेश प्रमुखलाई सिफारिस गर्ने निर्णय गरेको थियो।
मन्त्रिपरिषदले गरेको उक्त निर्णय बमोजिम प्रदेश प्रमुख अमिक शेरचनले संविधानको धारा १८३ (२) बमोजिम बुधबार राति १२ बजेदेखि अधिवेशन अन्त्य गरेको प्रदेश प्रमुखको कार्यालयले जनाएको छ।