प्युठान जिप दुर्घटना : गुल्मीका प्रशासकीय अधिकृतसहित ५ जनाको मृत्यु
प्रकाशित मिति : बैशाख १, २०७८ बुधबार
प्युठानको स्वर्गद्वारी नगरपालिका ४ रुमालेमा बुधबार बिहान जिप दुर्घटना हुँदा ५ जनाको मृत्यु भएको छ। नयाँ वर्षको अवसर पारेर स्वर्गद्वारी दर्शनका लागि गएको जिल्ला प्रशासन कार्यालय गुल्मीका कर्मचारीसहित १४ जना चढेको लु १ ज १६५५ नम्बरको जिप दुर्घटना भएको हो।
मृत्यु हुनेमा प्रशासकीय अधिकृत श्याम न्यौपाने, खरिदार यामलाल पन्थी, कम्प्युटर अपरेटर सूर्य पन्थी, मुद्दा शाखाका इश्वर भण्डारी र जिप चालक केशव कार्की छन्। पन्थी र भण्डारीको घटनास्थलमै मृत्यु भएका थियो।
बसलाई ओभरटेक गर्न खोज्दा जिप सडकबाट झण्डै १ सय मिटर तल खसेकाे थियो।
गम्भीर घाइते हुनेमा १२ वर्षीय पार्थक ज्ञवाली र प्युठान घर भई जिल्ला प्रशासन कार्यालय गुल्मीमा कार्यरत खरिदार ३५ वर्षीय सन्दिप परियार छन्। उनीहरुलाई थप उपचारका लागि हेलिकाेप्टरबाट काठमाडौं लगिएको छ।
अन्य घाइतेमा २३ वर्षीया सुुनिता कँडेल, २९ वर्षीया वसन्ती पौडेल, उनकी ४ वर्षीया छोरी निकिता पौडेल, ३० वर्षीया गीता मुखिया उनका १२ वर्षीय छोरा अनिस मुखिया, २४ वर्षीया तारा भडारी बोहरा, उनका ६ वर्षीय छोरा आशिष बोहरा, ३३ वर्षीय डिलबहादुर थापा, २७ वर्षीय कमला ज्ञवाली र २५ वर्षीय मुना पाण्डे छन् ।
जिपमा जिल्ला प्रशासन कार्यालयका कर्मचारी र उनीहरुका परिवार सवार रहेको बताइएको छ।