संसदमा नक्सा चर्चा : ‘चुच्चे नक्साको भ्रुण हत्या भएको हो?’
प्रकाशित मिति : चैत्र ३०, २०७७ सोमबार
प्रतिनिधिसभाको सोमबारको बैठकमा लिम्पियाधुरासहितलाई समेटेर प्रकाशित नेपालको नयाँ नक्साले चर्चा पायो। बैठकमा बोल्दै सांसदहरुले नक्सा प्रकाशित गरे पनि भूमि फिर्ता ल्याउन कुनै वास्ता नगरिएको भन्दै सरकारसँग जवाफ माग गरे।
नेपाली कांग्रेसका सांसद प्रदीप गिरिले प्रश्न गरे, ‘चुच्चे नक्सा कता हरायो, त्यसको भ्रुण हत्या भएको हो कि राष्ट्रिय राजनीतिको सानो मोहरामात्र हो?’
नेपाली कांग्रेसकै पुष्पा भूषालले सरकारबाट राष्ट्रियता देखाउने र चुच्चे नक्सा हराउने काम भएको भन्दै हालै वितरण गरिएका मान, पदवी र विभूषणमा समेत सो नक्सा नहुनु दुःखद् रहेको बताइन्। उनले संसद्बाट पारित चुच्चे नक्सालाई सरकारले पाठ्यक्रममा राख्न रोकेको भन्ने विषयका सम्बन्धमा जवाफ माग गरिन्।
सरकारले लिम्पियाधुरा,कालापानी र लिपुलेकसहितको भूभागलाई समेटेर नेपालको नयाँ नक्सा प्रकाशित गरे पनि भूमि फिर्ता ल्याउने कुनै पहल गरेको छैन। उक्त भूभाग भारतीय नियन्त्रणमै छ भने त्यस क्षेत्रमा नेपाली सुरक्षाकर्मी तथा नागरिकहरुलाई समेत जान दिइएको छैन।