बढ्दो कोरोना संक्रमण : शैक्षिक संस्था बन्द गर्न स्वास्थ्य मन्त्रालयले गर्यो सिफारिस
प्रकाशित मिति : चैत्र २७, २०७७ शुक्रबार
स्वास्थ्य तथा जनसंख्या मन्त्रालयले नयाँ भेरियन्ट तीव्र गतिमा फैलिन थालेको भन्दै शैक्षिक संस्था बन्द गर्न कोभिड क्राइसिस म्यानेजमेन्ट कमिटी (सिसिएमसी) लाई सिफारिस गरेको छ।
मन्त्रालयका सहप्रवक्ता डा समीरकुमार अधिकारीले पछिल्लो समय विद्यार्थीमा बढ्दो कोरोनाको जोखिमलाई मध्यनजर गर्दै शैक्षिक संस्था अनलाइनबाट सञ्चालन गर्न अनुरोध गरिएको बताए।
‘बिहीबारको संक्रमणलाई हेर्दा १७ प्रतिशतभन्दा बढी बालबालिका संक्रमित भएका छन्। हाल संक्रमण फैलिने ठाउँ विद्यालय देखिएको छ,’ डा अधिकारीले भने, ‘तत्काल नै विद्यालय बन्द गरिएन भने अवस्था भयावह हुनसक्छ।’
पछिल्लो समय १८ वर्षसम्मका उमेर समूहका विद्यार्थीमा संक्रमण बढ्दै गएको पाइएको छ। हालसम्म कुल संक्रमितमध्ये बालबालिकामा ७ प्रतिशत संक्रमण देखिएको छ।
यस्तै मन्त्रालयले २५ जनाभन्दा बढी भेला हुन रोक लगाउन पनि सिफारिस गरेको छ। स्वास्थ्य जोखिम बढ्ने भन्दै २५ जनाभन्दा बढी भेला हुन रोक लगाउनुपर्ने निष्कर्ष मन्त्रालयले निकालेको छ।
पछिल्लो २४ घन्टामा थप २ सय ८८ जनामा कोरोना संक्रमण पुष्टि भएको छ। ४ हजार ७१ नमुनाको पिसिआर परीक्षण गर्दा २ सय ८८ जनामा संक्रमण पुष्टि भएको मन्त्रालयले जनाएको छ। योसँगै नेपालमा कुल संक्रमितको संख्या २ लाख ७९ हजार ३ सय ८८ पुगेको छ।
शुक्रबार २ हजार ६ सय १५ सक्रिय संक्रमित छन्। गत २४ घन्टामा १ सय २७ जना संक्रमित निको भएका छन्। यो सँगै नेपालमा निको हुने संख्या २ लाख ७३ हजार ७ सय ३५ पुगेको मन्त्रालयले जनाएको छ।