एमाले प्रवेश गरेका ४ मन्त्रीको सांसद पद गुम्यो
प्रकाशित मिति : चैत्र २६, २०७७ बिहीबार
नेकपा माओवादी केन्द्र परित्याग गरी एमाले प्रवेश गरेका ४ सांसदको पद गुमेको छ। प्रतिनिधि सभाको बिहीबारको बैठकमा सभामुख अग्नि सापकोटाले माओवादी केन्द्रका तर्फबाट सांसद बनेका टोपबहादुर रायमाझी, गौरीशंकर चौधरी, प्रभु साह र लेखराज भट्ट सांसद पदमुक्त भएको जानकारी गराएका हुन्।
नेकपा माओवादी केन्द्रले चैत २४ गते संसद सचिवालयमा आफ्ना ४ सांसद एमालेको केन्द्रीय सदस्य बनिसकेको भन्दै दल त्यागसम्बन्धी विद्यमान कानूनमा भएको व्यवस्थाबमोजिम उनीहरुको स्थान रिक्त रहेको बारे सूचना दर्ता गराएको थियो।
सोही आधारमा सभामुख सापकोटाले रायमाझीसहित ४ जना पदमुक्त भएको र संसदमा माओवादी केन्द्रको ४ पदरिक्त हुन आएको जानकारी गराए।
योसँगै माओवादी केन्द्र प्रतिनिधिसभामा ४९ सिटमा खुम्चिएको छ।
अब राजनीतिक दलसम्बन्धी ऐन बमोजिम सदस्यको स्थान रिक्त भएको जानकारी सम्बन्धित सचिवालयले निर्वाचन आयोगलाई पन्ध्र दिनभित्र दिनु पर्नेछ। प्रत्यक्ष निर्वाचित सांसदका हकमा उपनिर्वाचन र समानुपातिक सांसदका हकमा समानुपातिक निर्वाचन प्रणालीअन्तर्गत निर्वाचित हुने व्यवस्था छ।