आजबाट नेपालमा चिनियाँ खोप वितरण सुरु, प्रभावकारिताबारे फरकफरक तथ्यांक
प्रकाशित मिति : चैत्र २५, २०७७ बुधबार
आजदेखि नेपालमा चीन सरकारले अनुदानमा दिएको कोरोनाबिरुद्धको खोप वितरण सुरु भएको छ। आजदेखि काठमाडौं उपत्यकामा तोकिएका अस्पतालबाट खोप वितरण सुरु गरिएको हो ।
उक्त खोप चीनको छात्रवृतिमा अध्ययन गरिरहेका विद्यार्थी, हिमालयपार व्यापारमा संलग्न व्यक्ति र अत्यावश्यक सेवामा संलग्न व्यक्ति लगायतलाई प्रदान गर्न सुरु गरिएको छ । अत्यावश्यक सेवाहरूमा स्वास्थ्य सेवा, खानेपानी, दुग्धपदार्थ वितरण, हवाई यातायात कर्मचारी, औषधि व्यवसायमा संलग्नहरू पर्छन् ।
चीनले नेपाल सरकारलाई अनुदानमा सिनोफार्मको ‘भेरोसेल’ खोपको ८ लाख डोज दिएको हो। चीन सरकारले चीनले विकास गरेको कोभिड खोप लगाएका विदेशीहरूलाई चीनमा आवतजावत सहज गराउने बताइसकेको छ ।
औषधि व्यवस्था विभागले यो खोपलाई गत फागुन ४ गते नै प्रयोगको अनुमति दिएको थियो। दुई डोज लगाउनुपर्ने खोप करिब २८ दिनको अन्तरालमा लगाउनु पर्छ। यो भ्याक्सिन ७९ प्रतिशत प्रभावकारी रहेको कम्पनीले जनाएको छ । ब्राजिल, टर्की र इन्डोनेशियामा गरिएका परीक्षणमा यो भ्याक्सिन ५० देखि ८३ दशमलव ५ प्रतिशत प्रभावकारी देखिएको छ । यो भ्याक्सिनको प्रभावकारिताबारे फरकफरक तथ्यांकहरु रहेका छन् ।
नेपालले अहिलेसम्म अक्सफर्ड आस्ट्राजेनेकाले विकाश गरेको र भारतको कम्पनीमा बनाइएको कोभिशिल्ड खोपमात्र वितरण गरेको छ । कोभिशिल्ड झण्डै १८ लाखलाई दिइसकिएको छ ।
मन्त्रालयसँग अब करिब साढे पाँच लाख मात्रा कोभिशिल्ड खोप बाँकी रहेको र सुरुमा लगाएकाहरुलाई दोस्रो मात्रा वैशाख ७ गतेदेखि दिइने जनाइएको छ ।