माओवादीले संसद सचिवालयमा दर्ता गरायो ४ सांसदले दल त्याग गरेको सूचना
प्रकाशित मिति : चैत्र २४, २०७७ मंगलबार
नेकपा (माओवादी केन्द्र) ले सर्वोच्चको फैसलापछि पनि पार्टीमा नफर्किएको भन्दै ४ सांसदले दल त्याग गरेको सूचना संसद सचिवालयमा दर्ता गराएको छ।
सर्वोच्चको फैसलाबमोजिम टोपबहादुर रायमाझी, लेखराज भट्ट, प्रभु साह र गौरीशंकर चौधरीले माओवादी केन्द्रको तर्फबाट प्रतिनिधित्व गर्नुपर्नेमा एमालेको गतिविधिमा संलग्न भएकाले उनीहरुले दल त्याग गरेको देखिएको भन्दै माओवादीले दल त्यागको सूचना संसद सचिवालयमा गराएको हो।
स्पष्टीकरण माग गर्दा तोकिएको समयमा स्पष्टीकरण नदिएकाले पार्टी अध्यक्ष पुष्पकमल दाहाल ‘प्रचण्ड’ को चैत २४ गतेको निर्णयबमोजिम उनीहरुले दल त्याग गरेको निर्णय भएको सो पार्टीले जनाएको छ।
राष्ट्रियसभा सदस्यका रुपमा मन्त्री बनेका रामबहादुर थापा ‘बादल’ का हकमा भने दलको नेता उपत्यका बाहिर रहेकाले सचिवालयमा जानकारी गराउन बाँकी रहेको सो पार्टीले जनाएको छ।
पत्रमा उनीहरुले दल त्याग गरेकाले उनीहरुको स्थान रिक्त रहेको जानकारी गराइएको छ। सचिवालयमा आएको पत्र अब सभामुखले सदनमा पढेर सुनाउनेछन्।
पार्टीले निष्कासन गरेपछि उनीहरुको सांसद पद गुम्नेछ। तर पनि छ महिनासम्म मन्त्री पदमा रहन पाउनेछन्। खानेपानीमन्त्री मणि थापा र खेलकुदमन्त्री दावा लामा संसद नभए पनि सरकारमा छन्। उनीहरु पनि माओवादी पृष्ठभूमि भए पनि एमालेमै रहेका छन्।