भारतद्वारा हुलाकी राजमार्गका १३ वटा खण्ड सरकारलाई हस्तान्तरण
प्रकाशित मिति : चैत्र १८, २०७७ बुधबार
भारत सरकारले निर्माण सम्पन्न भएका हुलाकी राजमार्गका १३ वटा खण्ड नेपाल सरकारलाई हस्तान्तरण गरेको छ।
बुधबार भौतिक योजना तथा यातायात मन्त्रालयमा आयोजित एक कार्यक्रमका बीच नेपालका लागि भारतीय राजदूत विनयमोहन क्वात्राले भौतिक पूर्वाधार तथा यातायातमन्त्री वसन्तकुमार नेम्वाङलाई ती सडकखण्ड हस्तान्तरण गरेका हुन्।
भारत सरकारको सहयोगमा निर्माण भएको १३ खण्डको लम्बाई २ सय ७३ किलोमिटर रहेको छ। हुलाकी राजमार्गको कुल लम्बाइ १ हजार ८ सय ५७ किलोमिटर छ।
तराई क्षेत्रको विकासका लागि महत्वपूर्ण मानिएको हुलाकी राजमार्गको निर्माण कार्य विभिन्न प्राविधिक कारणले गति लिन नसकेको थिएन।
हस्तान्तरण कार्यक्रममा मन्त्री नेम्वाङले भौतिक पूर्वाधार विकासमा भारतले गरेको सहयोगको प्रशंसा गरेका थिए।
यसैगरी राजदूत क्वात्राले नेपालको विकासका लागि भारतले आफ्नो तर्फबाट सक्दो सहयोग गर्ने बताए। जनकपुर–जयनगर रेल सञ्चालनका लागि भारत सरकारको तर्फबाट प्राविधिक र जनशक्ति सहयोग भएको उनले जानकारी दिए।