बेरोजगारी विमाको १० हजार २ सयको कर छुट १३ राज्यले नदिने, आईआरएसमा भने छुट
प्रकाशित मिति : चैत्र १८, २०७७ बुधबार
आईआरएसले बेरोजगारी विमाको सुरुको १० हजार २ सयमा कर छुटको व्यवस्था गरेपनि १३ राज्यहरुले भने उक्त रकममा राज्यको करमा छुट नदिने भएका छन् । एचआर ब्लकको तथ्यांक अनुशार अहिलेसम्म १३ राज्यले बेरोजगारी विमा रकमको सुरुको १० हजार २ सय डलरमा करछुट नदिएपछि ती राज्यहरुमा बसोबास गर्नेहरुले उक्त रकमको कर राज्यलाई भने बुझाउनुपर्ने भएको छ ।
ती राज्यहरुमा न्युयोर्क, कोलोराडो, जर्जिया, हवाई, आइदाओ, केन्टकी, मासाचुसेट्स, मिनेसोटा, मिसिसिपी, नर्थ क्यारोलिना, रोढ आइल्याण्ड, साउथ क्यारोलिना र वेष्ट भर्जिनिया रहेका छन् । १ दशमलव ९ ट्रिलियन डलरको राहत प्याकेजमा बार्षिक आम्दानी १ लाख ५० हजारभन्दा कम हुनेहरुलाई बेरोजगारी विमा रकमबाट प्राप्त १० हजार २ सयसम्ममा ट्याक्स नलाग्ने व्यवस्था गरिएको हो ।
इन्डियाना र विकन्सिन लगायतका राज्यहरुले उक्त रकममा आंशिक करछुट प्रदान गरेका छन् । कनेक्टिकट, आयोवा, इलिनोय, कन्सास, लुजियाना, मेन, मिसिगन, मिजौरी, नर्थ डाकोटा, नेब्रास्का, न्यु मेक्सिको, ओक्लोहोमा, ओरेगन र युटाहले सघीय सरकारकै नियमलाई अनुशरण गरेर बेरोजगारी विमा रकमको सुरुको १० हजार २ सयमा करछुट दिएका छन् । वासिंटन डिसीले पनि त्यस्तो छुट दिएको छ ।
एरिजोना, ओहायो, भर्माेन्ट लगायतका राज्यहरुले सघीय सरकारको नियम औपचारिक रुपमा नै अनुशरण त गरेका छैनन् । तर प्रशासनिक रुपमा करमा छुटको व्यवस्था गरेका छन् । हरेक राज्यका आआफ्ना नियम रहेकाले उनीहरुले फरक फरक तरिकाले यो विषयमा काम गरिरहेको जनाइएको छ ।