रेशम चौधरीको रिहाइका लागि सरकारले गठन गर्यो वार्ता टोली
प्रकाशित मिति : चैत्र १६, २०७७ सोमबार
कैलालीको टीकापुर काण्डमा दोषी ठहर भई जेल सजाय भोगिरहेका जनता समाजवादी पार्टी (जसपा) का निलम्बित सांसद रेशम चौधरीको रिहाइका लागि सरकारले वार्ता टोली गठन गरेको छ।
गृहमन्त्री रामबहादुर थापा ‘बादल’ को संयोजकत्वमा तीन सदस्यीय वार्ता टोली गठन गरिएको हो।
रेशम चौधरीको रिहाइसहित थारु कल्याणकारी सभा र केन्द्रीय आन्दोलन परिचालन समितिले अघि सारेका १९ बुँदे मागका बारेमा वार्ता गर्न सरकारले वार्ता टोली बनाएको हो।
टोलीमा प्रधानमन्त्री केपी शर्मा ओलीका विदेश मामिला सल्लाहकार राजन भट्टराई र पूर्वसांसद भगवती चौधरी सदस्य छन्।
वार्ता टोलीले सोमबारबाटै थारु कल्याणकारी सभासँग वार्ता सुरू गर्ने सरकारका प्रवक्ता सञ्चार तथा सूचना प्रविधिमन्त्री पार्वत गुरुङले जानकारी दिए।
चौधरीको रिहाइलगायतका माग राखेर थारु कल्याणकारी सभाले माइतीघर मण्डलामा धर्ना दिइरहेको छ। गृहमन्त्री थापा गत शुक्रबार सो धर्नामा आफैं उपस्थित भएर सरकारले वार्ता टोली गठन गरेर समस्याको समाधान गर्ने प्रतिवद्धता जनाएका थिए।
चौधरीसँग एमाले नेता महेश बस्नेतले केही दिनअघि डिल्लीबजार कारागारमा गई भेट गरेका थिए।