एमालेले निलम्बन गर्यो माधव नेपाल र भीम रावललाई, नेपालले भने–ओलीको कदम निरंकुश र स्वेच्छाचारी
प्रकाशित मिति : चैत्र १६, २०७७ सोमबार
एमाले अध्यक्ष केपी ओलीले वरिष्ठ नेता माधवकुमार नेपाल र उपाध्यक्ष भीम रावललाई पार्टी सदस्यबाट निलम्बन गरेका छन्।
पार्टीले सोधेको स्पष्टीकरण चित्तबुझ्दो नभएको भन्दै उनीहरुलाई ६ महिनाका लागि निलम्बन गरिएको हो।
एमालेले अन्तिम मौका दिइएको भन्दै आफ्ना क्रियाकलाप सच्याएर पार्टीका पक्षमा लाग्न पनि दुवै नेतालाई निर्देशन दिएको छ।
‘तपाईंलाई सच्चिनका लागि यो अन्तिम मौका हो। आफ्ना विचार र क्रियाकलापहरू सच्याइ पार्टीका पक्षमा आएमा पार्टीले निलम्बन अवधिको बीचमा पनि निलम्बनको अवधि घटाउने निर्णय गर्न सकिने र सच्चिन दिएको मौकालाई पार्टीको कमजोरी ठानी पार्टीविरोधी गतिविधिहरू कायमै राखेमा निलम्बन अवधिको बीचैमा थप कारबाही गर्न सकिने व्यहोरासमेत जानकारी गराइन्छ,’ दुवैलाई पठाएको पत्रमा भनिएको छ।
यसैबीच, वरिष्ठ नेता नेपालले ओलीको कदम निरंकुश र स्वेच्छाचारी भएको बताएका छन्। ओलीको कदम कम्युनिष्ट आन्दोलनलाई क्षतबिक्षत बनाउने र तहसनहस बनाउने सोचको उपज भएको उनको भनाई छ। उनले यो निर्णय अस्वीकार गर्ने पनि बताए।