के उबर चालकहरु पनि ३ सयका अतिरिक्त साप्ताहिक १ सयका लागि योग्य हुनेछन् ?
प्रकाशित मिति : चैत्र १४, २०७७ शनिबार
उबर चालकहरु वा अनलाइन प्लेटफर्म तथा एप्लीकेशनमार्फत काम गर्नेहरु स्वरोजगार अन्तरगत पर्छन् । यदि उनीहरुले बर्षमा ५ हजारभन्दा बढी आम्दानी गरेका छन् भने उनीहरु मिश्रित आम्दानीकर्ता बेरोजगारी क्षतिपूर्ति एमईयुसी कार्यक्रम मार्फत बेरोजगारी विमाको संघीय ३ सयका डलरका अतिरिक्त थप साप्ताहिक १ सयका लागि योग्य हुनसक्नेछन् ।
त्यस्तै जागिर र १०९९ मा काम गरेकाहरुले पनि १०९९ बाट ५ हजारभन्दा धेरै आम्दानी गरेका थिए भने यो कार्यक्रममा योग्य हुनसक्नेछन् । मिश्रित आम्दानी गरेकाहरु वा स्वरोजगार गरेकाहरुले यो कार्यक्रममार्फत फाइदा लिन सक्नेछन् । तर उनीहरुले नियमित बेरोजगारी विमा रकम पाइरहेको हुनुपर्छ, महामारी बेरोजगारी सहायता पाइरहेकाहरु भने योग्य हुनेछैनन् ।
यदि साप्ताहिक प्रमाणिकरण गर्ने बेलामा आवेदकलाई कोरोनासँग सम्बन्धित प्रश्नहरु सोधिएको छ भने उक्त व्यक्तिले पीयुए रकम पाइरहेको हुन्छ । तर यदि साप्ताहिक प्रमाणिकरण गर्दा सोधिने प्रश्नहरु कोरोना सम्बन्धित छैनन् भने उसले नियमित बेरोजगारी विमा रकम पाइरहेको बुझ्नुपर्छ । महामारीको बेलामा बेरोजगार भएका सबै स्वत पीयुए अन्तरगत पर्दैन ।
जनवरी ३ कै साताबाट रकम पाउने
मिश्रित आम्दानीकर्ता बेरोजगारी क्षतिपूर्ति एमईयुसी अन्तरगत योग्य हुनेहरुले बेरोजगारी विमाबाट संघीय सरकारबाट पाउने साप्ताहिक ३ सयमा एकसय थप गरेर साप्ताहिक ४ सय प्राप्त गर्नेछन् ।
अहिले योग्य हुने आवेदकहरुले जनवरी ३ कै साताबाट रकम पाउनेछन् भने सेप्टेम्बरमा ६ सम्म रकम प्राप्त गर्न सक्नेछन् । अहिले बेरोजगारी विमा रकम लिइरहेका स्वरोजगारहरु यो कार्यक्रमका लागि योग्य भएमा अहिले पाएको रकमभन्दा एकसय बढी पाउनेछन् ।
सन् २०१९ मा वा सन् २०२० मा स्वरोजगारबाट बार्षिक ५ हजार वा त्योभन्दा बढी नेट आम्दानी गरेकाहरु यो कार्यक्रमका लागि योग्य हुनेछन् । यो कार्यक्रमका लागि योग्य हुनका लागि एउटा आवेदन दिनुपर्छ भने आवेदनका साथमा स्वरोजगारबाट आम्दानी गरेको प्रमाण पनि पेश गर्नुपर्छ । प्राय आवेदकका सन्दर्भमा २०१९ को ट्याक्स रिर्टनलाई आधार मान्न सकिने डिपार्टमेन्ट अफ लेबरले जनाएको छ ।
२०१९ मा ट्याक्स फाइल नगरेकाहरुले पनि प्रमाणका रुपमा पेचेक स्टब, बैंक रिसिप्ट, विजनेश रेकर्ड, सम्झौता, बिल लगायतका कागजातहरु पेश गर्न सक्नेछन् । ५ हजार भन्दा कम आम्दानी भएका स्वरोजगारहरुलाई भने यो कार्यक्रमका लागि आवेदन नदिन सुझाव दिइएको छ । आवेदन एकपटकमात्र दिन डिपार्टमेन्ट अफ लेवरले सुझाव दिएको छ ।
अनलाइन वा फोनमार्फत आवेदन
कार्यक्रमका लागि योग्य हुनका लागि अनलाइनमार्फत वा फोनमार्फत आवेदन दिन सकिनेछ । तर अनलाइनमार्फत आवेदन दिनु बढी छिटो र सुरक्षित हुने सुझाव दिइएको छ । अनलाइनमार्फत आवेदन दिनका लागि आफ्नो अनलाइन एकाउन्ट लगइन गरेर अनलाइन फर्म सेक्सनमा जानुपर्छ । उक्त सेक्सनमा फर्म उपलब्ध हुनेछ ।
याद गर्नुहोस्, यदि तपाईले पीयुए लिइरहनुभएको छ भने तपाईको एकाउन्टमा उक्त फर्म उपलब्ध हुनेछैन । यदि तपाई स्वरोजगार हुनुहुन्थेन तर तपाईको अनलाइनमा उक्त फर्म देखिएको छ भने उक्त फर्म वेवास्ता गर्नुहोला ।
फोनमार्फत आवेदन दिनका लागि ८३३ ७१९ १९०४ मा फोन गर्नुपर्छ । फोनबाट आवेदन दिनेहरुले हुलाक वा फ्याक्समार्फत आम्दानीको प्रमाण पठाउनुपर्ने भएकाले झन्झटिलो र ढिलोसमेत हुनसक्ने जनाइएको छ ।