प्रचण्डले गरे महन्थ ठाकुरलाई प्रधानमन्त्री बन्ने प्रस्ताव
प्रकाशित मिति : चैत्र १४, २०७७ शनिबार
सरकार र जनता समाजवादी पार्टीबीच सत्ता समीकरणका विषयमा भएको छलफल सहमतिनजिक पुगेको चर्चा चलिरहेका बेला जसपा अध्यक्ष महन्थ ठाकुरलाई प्रधानमन्त्री बनाउने प्रस्ताव आएको छ।
शनिबार प्रज्ञा प्रतिष्ठानको डबलीमा नागरिक आन्दोलनले गरेको कार्यक्रममा नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले ठाकुरलाई सरकारको नेतृत्व लिन आग्रह गरेका हुन्।
प्रचण्डले सरकारको नेतृत्व लिएर समस्या समाधान गर्न ठाकुरलाई आग्रह गरेका हुन्।
‘तपाईं नै सरकार बनाउनुस् र हल गरौँ भन्ने मेरो प्रस्ताव हो। एक हप्ताभित्र हाम्रो सरकार बन्छ,’ उनले भने, ‘तपाईंकै नेतृत्वमा सरकार बनाऔं अनि हल गरौँ। अब अरुको नेतृत्वमा किन जाने?’
संसदमा संविधान संशोधन प्रस्ताव लैजाने आफू नै भएको भन्दै प्रचण्डले उक्त प्रस्ताव असफल बनाउने केपी शर्मा ओली नै भएको कुरा स्वीकार गर्नसमेत उनले महन्थलाई आग्रह गरेका थिए।
ठाकुरले पनि आफूले उठाएको माग सम्बोधन गराउने अवस्थामा आफूहरु मुलुकलाई निकास दिन तयार रहेको बताए। उनले मुलुकलाई समस्या परेका बेला आफूले नै निकास दिने गरेको स्मरण गरे।
सत्ता समीकरणका लागि दलहरुसँग छलफल जारी राखे पनि जसपाभित्र पनि अब आफैं सरकारको नेतृत्वका लागि पहल गर्नुपर्ने बहस सुरु भएको छ।
केही दिनअघि पनि ठाकुरले पनि पार्टी सत्ता नेतृत्वका लागि तयार भएको संकेत गरेका थिए। ‘हामी सत्ताको केन्द्रमा छैनौं,’ ठाकुरले भनेका थिए, ‘हामी त कहीँ छैनौं, तीन दलीय गठबन्धनमा पनि हामी कहाँ पर्छौं र? हामी आन्दोलनमा जहिले पनि हुन्छौं। इतिहासमा त परिणाम देखिन्छ। तर, परिणाम हाम्रो पक्षमा हुँदै हुँदैन।’
सत्ता समीकरणका लागि जसपाले रेशम चौधरी तथा मधेश आन्दोलनका क्रममा पक्राउ परेकाहरुको रिहाइ, संविधान संशोधनलगायतका मागहरुलाई अगाडि सार्दै आएको छ। यस विषयमा सरकारले सकारात्मक जवाफ दिएको ठाकुरको भनाई छ।
सरकारलाई दिएको समर्थन माओवादीले फिर्ता लिने
प्रज्ञा भवनको कार्यक्रममा प्रचण्डले सरकारलाई आफनो पार्टीले दिएको समर्थन केही दिनभित्रै फिर्ता लिने बताएका थिए। प्रतिनिधिसभाको विघटनपछि आन्दोलनमा रहेका प्रमुख राजनीतिक दलबीचमा सहकार्य हुने वित्तिकै वर्तमान सरकारविरुद्ध अविश्वासको प्रस्ताव दर्ता र नयाँ सरकारको खाकासमेत आउने उनको भनाइ थियो।