माधव नेपाल र भीम रावललाई कारबाही गर्ने ओलीको संकेत
प्रकाशित मिति : चैत्र १३, २०७७ शुक्रबार
प्रधानमन्त्री एवं एमाले अध्यक्ष केपी ओलीले वरिष्ठ नेता माधव नेपाल र उपाध्यक्ष भीम रावललाई कारबाही गर्ने संकेत गरेका छन्।
बालुवाटारमा शुक्रबार भएको एमाले संसदीय दलको बैठकमा ओलीले नेपाल र रावलले फर्काएको स्पष्टीकरणको जवाफ कारबाहीको भागीदार हुनेखालको भएको बताएका थिए।
बैठकपछि प्रमुख सचेतक विशाल भट्टराईले फागुन २८ को निर्णय फिर्ता नहुने र माधव नेपालहरु स्पष्टीकरणको जवाफीपत्र कारबाहीका भागीदार हुने बताए।
नेपाल र रावलले पार्टीले सोधेको स्पष्टीकरणको जवाफ बिहीबार पठाएका थिए। नेपालले ओलीले सोधेको १० बुँदे स्पष्टीकरणको काउन्टर जवाफ १३ बुँदमा दिएका थिए। उनीहरूले जवाफभन्दा पनि पार्टी अध्यक्ष ओलीलाई नै प्रश्नहरू लेखीपठाएका थिए।
शुक्रबारको संसदीय दलको बैठकमा वरिष्ठ नेता झलनाथ खनाल भने उपस्थित भएका थिए। बैठकमा छोटो समय उपस्थित भएका खनालले पार्टीलाई जेठ २, २०७५ को अवस्थामा फर्काएर पार्टीलाई अघि बढाउनुपर्ने माग राखेका थिए। ओलीले भने फागुन २८ को निर्णयबाट पछि नहट्ने संकेत गरेका थिए।
फागुन २८ गते बालुवाटारमा बसेको ओलीपक्षीय केन्द्रीय समितिको बैठकले केन्द्रीय समिति तथा विभागहरुमा हेरफेर गरेका थिए। उक्त निर्णयको नेपाल–खनाल पक्षले विरोध जनाउँदै फिर्ता लिन माग गर्दै आएका छन्।