कोरोनाको जोखिम बढेपछि उपत्यकाका तीन वटै प्रशासनले भने-घरबाहिर अनिवार्य मास्क प्रयोग गरौं
प्रकाशित मिति : चैत्र ११, २०७७ बुधबार
काठमाडौं उपत्यकाका तीनै जिल्ला प्रशासन कार्यालयहरुले भारतमा कोरोना संक्रमण बढ्दै गएको सन्दर्भमा स्वास्थ्य मापदण्ड पालना गर्न आग्रह गरेका छन्।
प्रशासन कार्यालयहरुले बुधबार विज्ञप्ति जारी गर्दै सार्वजनिक स्थलमा भीडभाड नगर्न, फागू पर्वलाई घरभित्रै सीमित राख्न, घरबाहिर तथा सार्वजनिक यातायात प्रयोग गर्दा अनिवार्य मास्क, स्यानिटाइजर र सामाजिक तथा भौतिक दूरी कायम राख्न आग्रह गरेका हुन्।
स्वास्थ्यका मापदण्ड पूरा नगर्ने व्यक्तिलाई संक्रामक रोग ऐन २०२० बमोजिम कारबाही गर्ने चेतावनीसमेत जिल्ला प्रशासनहरुले दिएका छन्।
हालका दिनमा कोभिड १९ को संक्रमणको जोखिम उच्च रही संक्रमण दर क्रमशः बढ्दै गइरहेको र भारतसँगको खुला सीमानाका कारण सीमा नाकाहरुबाट आउने मानिस दैनिक रुपमा काठमाडौं उपत्यकामा आवतजावत गर्ने क्रम बढ्दै गएकाले यहाँ जोखिम बढेको प्रशासनको भनाइ छ।