Follow @khasokhasmag

बिटक्वाइन ३ लाख डलरसम्म पुग्ने र फोका झैं फुटेर ९० प्रतिशतसम्म गिरावट आउने चेतावनी


प्रकाशित मिति : चैत्र ९, २०७७ सोमबार

चर्चित क्रिप्टो व्यवसायी बबी लीले क्रिप्टोकरेन्सी बिटक्वाइनको मूल्य ३ लाख डलरसम्म हुनसक्ने अनुमान गरेका छन् । ऐतिहासिक संरचनालाई हेर्दा ३ लाख डलरसम्म पुग्नसक्ने तर उचाइमा पुगेपछि फोका फुटेर बर्षौसम्म मूल्य कमजोर हुनसक्ने उनले चेतावनी दिएका छन् ।

बबी ली क्रिप्टो एक्सचेन्ज बीटीसीसीका पूर्व सीईओ तथा सहसंस्थापक हुन् । बिटक्वाइनको बजार हरेक ४ बर्षमा उच्चतम बिन्दुमा पुग्ने र यसपटक ठूलोमध्येको एक रहेको उनको भनाई छ । उनी हाल क्रिप्टो वालेट ब्यालेटका प्रमुख कार्यकारी समेत हुन् । उनले आगामी समरसम्म १ लाख डलरसम्म पुग्ने अनुमान गरेका छन् ।

४ बर्ष अगाडि बिटक्वाइनको मूल्य १ हजार डलरबाट एकैपटक २० हजार डलर पुगेको थियो । २०२१ मा प्रवेश गर्दा बिटक्वाइनको मूल्य ३० हजार डलरको हाराहारीमा रहेको थियो । तर इतिहास दोहोरिने कुरामा आफू निश्चित नभएको उनको भनाई छ ।

बिटक्वाइनको मूलय २०२१ मा ६० हजार डलरसम्म पुगेको छ । र अन्तिमपटक यो ५७ हजार ६ सय ६० डलरमा किनबेच भएको तथ्यांकले देखाएको छ । एकपटक उच्चतम बिन्दुमा पुगेर फोका फुटेपछि बिटक्वाइनको मूल्यमा ८० देखि ९० प्रतिशतसम्म गिरावट आउनसक्ने भएकाले लगानीकर्ताहरुलाई सचेत हुन उनले चेतावनी दिएका छन् ।

बिटक्वाइन असाध्यै अस्थीर भएकाले यसमा लगानी गर्ने व्यक्ति अत्यन्तै सावधान र चनाखो हुनुपर्ने उनको भनाई छ । भारतमा बिटक्वाइन प्रतिबन्धको प्रस्ताव गरिएको छ । साथै उक्त प्रस्तावमा बिटक्वाइन माइन गर्ने र किनबेच गर्नेहरुलाई पनि जरिवानाको व्यवस्था गरिएको छ ।

भारतबाट झण्डै १ दशमलव ४ बिलियन डलर बिटक्वाइनमा लगानी रहेको अनुमान छ । सरकारी प्यानलले सन् २०१९ मा पनि बिटक्वाइनको कारोबार गर्नेहरुलाई १० बर्षसम्म जेल सजायको सिफारिस गरेको छ ।

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com