सिमाक्षेत्रमा प्रकृया चलुन्जेल कागजपत्रविहिनलाई होटलमा राख्न ९० मिलियनको सरकारी सम्झौता
प्रकाशित मिति : चैत्र ८, २०७७ आईतबार
सिमाक्षेत्रमा प्रकृया चलुन्जेल कागजपत्रविहिनलाई होटलमा राख्न अमेरिकी सरकारको इमिग्रेशन एण्ड कस्टम इन्फोर्समेन्ट आइसले झण्डै ९० मिलियन डलरको सम्झौता गरेको छ । मध्य अमेरिकी देशहरुबाट अमेरिकी सिमा क्षेत्रमा आएर शरण दावी गर्नेहरुलाई होटलमा राख्न गैर नाफामुलक संस्थाहरुसँग यो सम्झौता गरिएको हो ।
सिमा क्षेत्रमा शरण दावी गर्नेहरुको प्रकृयामा भारी ब्याकलग भएपछि उनीहरुलाई प्रतिक्षाका लागि होटलमा आवास दिइने भएको हो । अमेरिकी सिमाक्षेत्रमा बालबालिकाहरुसहित अमेरिका प्रवेशका लागि आउने कागपत्रविहिनहरुको यति धेरै संख्या २० बर्षमा नै पहिलोपटक देखिएको जनाइएको छ ।
८९ दशमलव ६ मिलियनको सम्झौता अनुशार १२३९ बेडहरु र अन्य आवश्यक सेवाहरु प्रदान गरिने भएको छ । सम्झौता अनुशार कागजपत्रविहिन परिवारहरुलाई टेक्सास र एरिजोनाको सिमाक्षेत्रका होटलहरुमा राखिने भएको छ । यो सम्झौता अहिलेका लागि ६ महिनाको हुने र पछि थपिन समेत सक्ने जनाइएको छ ।
यसरी राखिएका परिवारहरुले कोरोना परीक्षण लगायतका कैयन स्वास्थ्य सुविधाहरु समेत प्राप्त गर्नेछन् । तर कोरोनाको महामारीका कारण कैयन व्यक्तिलाई सिमाक्षेत्रबाट अमेरिका आउन नदिई फर्काइने भएकाले आप्रवासीहरुलाई खतरनाक यात्रा पार गरेर नआउन चेतावनी समेत दिइएको छ ।
सिमा खुला नरहेको र सीडीसीको गाइडलाइन अनुशार अधिकांशलाई फिर्ता पठाइएको आइसले जनाएको छ । यसैबीच अमेरिकी सरकारको होमल्याण्ड सेक्युरिटीका सेक्रेटरी अलेहान्द्रो मेयरकासले पनि दक्षिणी सिमाक्षेत्र बन्द रहेको बताएका छन् ।