कैयन अमेरिकनको राहत चेक गलत बैंक एकाउन्टमा, यसरी गर्नुहोस् ट्रयाक
प्रकाशित मिति : चैत्र १, २०७७ आईतबार
शुक्रबार आईआरएसले पठाएको तेश्रो चरणको राहत चेक कैयन अमेरिकनहरुको गलत बैंक खातामा गएको छ । जसका कारण सही एकाउन्टमा राहत चेक प्राप्त गर्न उनीहरुलाई लामो समय लाग्ने देखिएको छ ।
कतिपय करदाताहरुले अनलाइनबाट चेक गर्दा बैंक एकाउन्टको अन्तिमको चार नम्बर गलत भएको पत्ता लगाएका थिए । ट्याक्स फाइल गरिदिने थर्ड पार्टीका कारण यस्तो समस्या उत्पन्न भएको जनाइएको छ । ट्याक्स फाइल गर्दा रिफण्ड प्राप्त गर्न थर्डपार्टी अस्थायी एकाउन्ट बनाएकाहरुका सन्दर्भमा यो समस्या भएको हो ।
विगतका दुईवटा राहत चेकका सन्दर्भमा पनि यस्तो समस्या देखिएको थियो । जसका कारण उनीहरुलाई रकम प्राप्त गर्न लामो समय लाग्नेमात्र होइन, ट्याक्स फाइल गर्दा रिबेट दावी गर्ने अवस्था आएको थियो । यसपटक यो समस्या आईआरएसले कसरी सम्बोधन गर्छ भन्नेबारे केही बताएको छैन ।
यसरी गर्नुहोस् ट्रयाक
तपाईको एकाउन्टमा कुन दिन राहत चेक पठाइदैछ ? कुन विधिबाट पठाइदैछ ? कुन एकाउन्टमा पठाइदैछ ? त्यो हेर्नमिल्ने टुल युएससीआईएसले व्यवस्था गरिसकेको छ ।
आफ्नो राहत चेक कुन बिधिबाट कहिले आउँछ थाहा पाउन यहाँ क्लीक गर्नुहोला ।
क्लीक गरिसकेपछि तपाईले फर्ममा सोसल सेक्युरिटी नम्बर, जन्ममिति, स्ट्रीटको ठेगाना र जीपकोड हाल्नुपर्छ । ठेगाना हाल्दा तपाईले स्ट्रीटको ठेगाना र अपार्टमेन्ट नम्बरमात्र हाल्नुपर्छ । सिटी र स्टेट उल्लेख गर्नुपर्दैन ।
तपाईको घरनम्बर र स्ट्रीट नम्बर हालेपछि अपार्टमेन्ट नम्बर उल्लेख गर्नुपर्छ । उदारहणका लागि तपाई ९७२० ५७ एभिन्युमा बस्नुहुन्छ भने त्यतीमात्र हालेर कमा पछि अपार्टमेन्ट नम्बर उल्लेख गर्नुपर्छ ।
पहिलो र दोश्रो चरणको चेकको स्टाटस हेर्न भने अनलानमा एकाउन्ट बनाउन जरुरी हुन्छ ।
रकम प्राप्त गर्नका लागि योग्य व्यक्तिले कुनै कदम चाल्नुनपर्ने जनाइएको छ ।
राष्ट्रपति जो बाइडेनले बिहिबार नै राहत चेक समेटिएको १ दशमलव ९ ट्रिलियनको राहत प्याकेजमा हस्ताक्षर गरेका थिए । यो प्याकेजमा राहत चेकका अतिरिक्त अत्यन्तै उदार चाइल्ड ट्याक्स क्रेडिट र बेरोजगारी विमा रकमका अतिरिक्त साप्ताहिक रकमको अवधि थप लगायतका प्रावधानहरु समेटिएको छ ।
आईआरएससँग बैंक एकाउन्ट नभएकाहरुले भने राहत चेकको रकम पाउन केहीसमय प्रतिक्षा गर्नुपर्नेछ । उनीहरुले डेबीट कार्ड वा कागजको चेकमार्फत रकम पाउनेछन् ।
७५ हजार भन्दा कम बार्षिक आम्दानी भएकाले १४ सय डलर, १ लाख ५० हजार भन्दा कम आम्दानी भएका दम्पत्तिले २८ सय र हरेक डिपेन्डेन्टका लागि १४ सय डलरका दरले रकम प्राप्त हुनेछ ।
राहत चेक २०१९ वा २०२० को आम्दानीको आधारमा हुनेछ । सन् २०२० को ट्याक्स फाइल गरिसकेकाहरुका सन्दर्भमा २०२० कै आम्दानीका आधारमा र नगरेकाहरुको सन्दर्भमा २०१९ को आम्दानीका आधारमा चेक प्राप्त हुनेछ । उदाहरणका लागि दुईवटा बच्चा भएका दम्पत्तिले ५६ सय डलरको चेक पाउनेछन् ।