१० महिना अगाडि न्युयोर्कमा मृत्यु भएका नेपालीको आज न्युयोर्कमै दाहसंस्कार
प्रकाशित मिति : फाल्गुन २५, २०७७ मंगलबार
१० महिना अगाडि न्युयोर्कमा मृत्यु भएका नेपाली सयलक बुढामगरको आज न्युयोर्कमा नै दाहसंस्कार गरिने भएको छ । कोरोना महामारीको बेलामा न्युयोर्कको एल्महस्र्ट अस्पतालमा गत मे २३ मा मृत्यु भएका रुकुमको तकसेरा स्थायी घर भएका बुढामगरको आज न्युयोर्ककै बु्रकलिनमा रहेको इन्टनेशल फ्युनेरल सर्भिस नामको फ्युनेरल होममा दाहसंस्कार गर्न लागिएको हो ।
सन् १९७८ को मे १९ मा जन्मिएका बुढामगरको जन्मदिनको ४ दिनपछि अर्थात् सन् २०२० को मे २३ मा मृत्यु भएको थियो ।
आफूहरुले मृतकको शव नेपाल पठाउन वा नेपालबाट परिवारका सदस्यहरु अमेरिका झिकाउन प्रयास गरेपनि शव पठाउन अस्पतालले स्वीकृत नदिएपछि र नेपालबाट परिवारका सदस्यहरु आउन दूतावासले भिसा नदिएपछि झण्डै १० महिनापछि आज न्युयोर्कमै दाहसंस्कार गर्न लागिएको मगर संघ अमेरिकाका कुलदिप रानामगरले खसोखासलाई जानकारी दिए । मगर संस्कार अनुसार नै शवको अन्त्येष्टि गरिने उनले जानकारी दिए ।
मृतक बुढामगर तीनबर्ष अगाडि मेक्सिकोको बाटोहुँदै हिडेर अमेरिका प्रवेश गरेका कागजपत्रविहिन थिए । अनेकौं समस्या भोग्दै अमेरिका आएका उनको फोक्सोमा समस्या रहेको र त्यही समस्या बल्झेर कोरोना महामारीका बीच निधन भएको थियो । उनका श्रीमती र छोराछोरीले दाहसंस्कारमा अमेरिका आउन अमेरिकी दूतावास काठमाडौंमा भिसा आवेदन दिएपनि दूतावासले भिसा अस्वीकार गरिदिएको थियो । अब परिवारका सदस्यको उपस्थीति विना नै दाहसंस्कार गरिने भएको छ ।
शवलाई १० महिनाभन्दा लामो समयसम्म फ्युनेरल होममा मासिक ७५० डलर तिरेर राखिएको थियो । मगर संघ अमेरिकाका अध्यक्ष पहलमा गेमी तकसेरा समाजका न्युयोर्कको च्याप्टर इश्वर बुढामगर, मगर संघ अमेरिकाका न्युयोर्क च्याप्टरका अध्यक्ष याम पुनमगर र लुकुम समाजका अध्यक्ष सुरेश पुन मगरको नेतृत्वमा दाहसंस्कार र परिवारको सहयोगका लागि झण्डै ४५ हजार अमेरिकी डलर सहयोग समेत उठाइएको छ ।
दाहसंस्कार लगायतको खर्चबाट बचेको रकम परिवारलाई पठाइने भएको छ ।
बुढा मगरको मृत्युु पछि गत बर्षको मे २४ मा मगर संघ अमेरिकाका केन्द्रिय अध्यक्ष कुलदिप राना मगरको संयोजकत्वमा स्व सयलाक बुढा मगर परिवार सहयोग समुह निर्माण गरेर आर्थिक सहयोग संकलन गर्ने , लास ब्यबस्थापन गर्ने र परिवारको भिषा प्रक्रिया अगि बढाउने कार्यहरु अगाडि बढाइएको थियो । अध्यक्ष रानामगरले भने – ‘थुप्रै आशा र सपनाहरु बोकेर अनेक कष्टहरु झेल्दै अमेरिका प्रवेश गरेका रुकुम पुथा उत्तरगंगा गाउपालिका तकसेराका सयलाक बुढा मगरका आशा र सपनाहरु अमेरिकामै बिलिन भए । उहाँप्रति हार्दिक श्रद्धाञ्जली र शोकाकुल परिवारमा समवेदना ।’