अमेरिकी दूतावास काठमाडौंबाट विद्यार्थी सहित ७ प्रकारका भिसा जारी गर्न सुरु
प्रकाशित मिति : फाल्गुन २२, २०७७ शनिबार
अमेरिकी दूतावास काठमाडौंले विद्यार्थी सहित ७ प्रकारका भिसा जारी गर्न सुरु गरेको छ । दूतावासले अपडेट गरेको सुचना अनुशार विना अन्तरवार्ता नविकरण गर्ने भिजिटर भिसा बीवान /बी टु भिसा, सिमित संख्यामा क्रु मेम्बर सी वान / डी भिसा, सिमित संख्यामा विद्यार्थी भिसा एफ, एम र एक्सचेन्ज भिजिटर जे भिसा, मेडिकल वा अन्य आपतकालिन अवस्थाका अन्य गैरआप्रवासी भिसा जारी गर्नका लागि अप्वाइन्टमेन्ट दिन थालेको छ ।
दूतावासले सिमित संख्यामा कामदार भिसा एच र एलका लागि समेत भिसा अप्वाइन्टमेन्ट दिन थालेको छ ।
त्यस्तै विद्यार्थी भिसा आवेदकका लागि विगतमा कोरोना महामारीका कारण शीघ्र अप्वाइन्टमेन्टको व्यवस्था खारेज गरिएकोमा अमेरिकी दूतावास काठमाडौंले उक्त व्यवस्था पुन लागु गरेको छ । अर्थात् निश्चित मापदण्ड पूरा गरेका विद्यार्थी भिसाका आवेदकहरुले शीघ्र अप्वाइन्टमेन्ट समेत लिनसक्ने भएका छन् ।
यदि विगत १२ महिनामा भिसा अस्वीकृत भएको छैन र कार्यक्रमको शुरु हुने अपेक्षित मितिको लागि कुनै अनलाइन अपोइन्टमेन्ट उपलब्ध छैनन् भने त्यस्ता विद्यार्थी भिसा र एक्सचेन्ज भिसाका आवेदकहरुले शीघ्र अप्वाइन्टमेन्ट लिनसक्नेछन् । त्यस्तै एकबर्ष वा लामो समय पढाई स्थगित गरेर पुन पढाई सुचारु गर्नका लागि अमेरिका फर्कन थालेका विद्यार्थी/एक्सचेन्ज भिजिटरले समेत शीघ्र अप्वाइन्टमेन्ट लिन सक्नेछन् ।
शीघ्र अप्वाइन्टमेन्ट लिनका लागि सुरुमा डीएस १६० फर्म भरेर भिसा शुल्क तिर्नुपर्छ । अनि अनलाइनबाट उपलब्ध सबैभन्दा अगाडिको कुनै पनि मितिको अप्वाइन्टमेन्ट लिनुपर्छ । त्यसपछि शीघ्र अप्वाइन्टमेन्टको विकल्प दिइन्छ । त्यसपछि शीघ्र अप्वाइन्टमेन्टको फर्म भरेर कल सेन्टरमा सम्पर्क गर्नुपर्छ । दूतावासले तपाईको शीघ्र अप्वाइन्टमेन्ट स्वीकृत भएकोबारे इमेलमार्फत जानकारी गराउँछ । त्यसपछि तपाईले शीघ्र अप्वाइन्टमेन्टको मिति तय गर्न सक्नुहुनेछ ।
अहिलेसम्म काठमाडौंमा रहेको अमेरिकी दूतावासले विद्यार्थी भिसा जारी नगरेपछि नेपालीहरु दिल्ली र अन्य दूतावासबाट विद्यार्थी भिसा लिइरहेका थिए । जनवरीमा दिल्लीमा रहेको अमेरिकी दूतावासमार्फत अमेरिकाको विद्यार्थी भिसा लिने नेपालीहरुको संख्या उल्लेख्य रहेको थियो । काठमाडौंमा रहेको अमेरिकी दूतावासले एकजनालाईमात्र विद्यार्थी भिसा जारी गरेपनि जनवरीमा विद्यार्थी भिसा पाउने नेपालीहरुको कुल संख्या भने १ सय ११ रहेको थियो । उनीहरुका ५ जना डिपेण्डेण्टहरुले समेत भिसा पाए ।
आप्रवासी भिसा आवेदकलाई जानकारी कुर्न सुझाव
डिभी २०२१ का विजेता लगायत अन्य आप्रवासी भिसा आवेदकलाई भने अप्वाइन्टमेन्ट तय भएको नोटिफिकेशन कुर्न र धैर्य रहन अमेरिकी दूतावास काठमाडौंले सुझाव दिएको छ । पहिले नै अन्तरवार्ता भइसकेका तर कार्यकारी आदेशका कारण भिसा अस्वीकृत भएका आप्रवासी भिसा आवेदकहरुलाई अब चाल्नुपर्ने कदमबारे दूतावासले सुचित गर्ने जनाएको छ ।
‘हामीले २०२१ का डाइभर्सिटी भिसा आवेदकहरुसहित आप्रवासी भिसा आवेदकलाई धैर्य रहन र अप्वाइन्ट तय भएको सुचना प्राप्त नहुँदासम्म पर्खन प्रोत्साहित गर्दछौं । पहिले नै अन्तरवार्ता भएर राष्ट्रपतिको कार्यकारी आदेश १००१४ का कारण भिसा अस्वीकृत भएकाहरुले अब चाल्ने कदमका सन्दर्भमा दूतावासबाट निर्देशनहरुको प्रतिक्षा गर्नुपर्छ ।’ – दूतावासकी प्रवक्ता अन्ना रिची एलेनले खसोखासलाई जानकारी दिइन् ।
ग्राहक र कर्मचारीहरुको सुरक्षा र स्वास्थ्यको संरक्षणका लागि लागु गरिएका मापदण्डहरुका कारण दूतावासको अप्वाइन्टमेन्ट निर्धारण क्षमता सिमित रहेकोबारे सबै भिसा आवेदकहरु समेत हुनुपर्ने प्रवक्ताको भनाई छ । सेवा सुचारुबारे अमेरिकी विदेशमन्त्रालयको निर्देशिका अनुशार आप्रवासी भिसाका अप्वाइन्टमेन्टहरु सकेजति तय गर्ने कामलाई निरन्तरता दिने दूतावासले जनाएको छ ।
दूतावासले यसबारेका वेवसाइटमा पनि सुचना राखेको छ । आवेदक र कर्मचारीहरु दुबैका लागि सुरक्षित हुने तरिकाले अमेरिका र नेपालबीचको यात्रा सहज बनाउन तथा पूरै भिसा सेवा संचालन गर्न दूतावासले काम गरिरहेको वेवासाइटमा प्रकाशित सुचनामा उल्लेख छ । तर दूतावासले कहिलेदेखि नियमित भिसा सेवा संचालन गर्ने भन्नेबारे केही बताएको छैन ।
२४ महिनाभित्र भिसा सकिएकाले विना अन्तरवार्ता मार्च ३१ सम्म भिसा नविकरण गर्न पाउने
गैर आप्रवासी भिसाका आवेदकहरुका सन्दर्भमा भिसा शुल्क सन् २०२२ को सेप्टेम्बर ३० सम्म अद्यावधिक रहने र उक्त अवधिसम्मको भिसाका लागि सोही देशमा प्रयोग गर्न सकिने दूतावासले जनाएको छ ।