सूर्य चिन्ह हामीले नै पाउँछौं : प्रचण्ड
प्रकाशित मिति : फाल्गुन १७, २०७७ सोमबार
नेपाल कम्युनिस्ट पार्टी (नेकपा) को प्रचण्ड–माधव समूहका अध्यक्ष पुष्पकमल दाहाल ‘प्रचण्ड’ ले पार्टीको आधिकारिकता र सूर्य चिह्न आफूहरूले पाउने दावी गरेका छन्।
नेकपाको पेशागत महासंघ र नेपाल राष्ट्रिय कर्मचारी महासंघको एकता घोषणालाई सोमबार काठमाडौंमा सम्बोधन गर्दै प्रचण्डले आफूहरुले नै सूर्य चिन्ह पाउने दाबी गरेका हुन्।
‘केही समयभित्रै निर्वाचन आयोगले हामीलाई नै आधिकारिकता दिन्छ, मैले त्यत्तिकै भनेको होइन बुझेर भनिरहेको छु,’ प्रचण्डले भने, ‘सेटिङ गरेर भनेको होइन संविधान र कानुनअनुसार भनिरहेको छु। दलको आधिकारिकता र सूर्य चिह्न हामीले पाइ नै सक्यौं केवल घोषणा हुन बाँकी छ।’
सूर्य चिह्न ओली पक्षतिर जान्छ भनेर भ्रममा नपर्न पनि उनले आग्रह गरे।
सर्वोच्च अदालतले प्रतिनिधिसभा विघटनलाई असंवैधानिक भनिसकेपछि नैतिकताका आधारमा ओलीले तत्काल राजीनामा गर्नुपर्ने प्रचण्डले बताए।
‘सिंगै आफ्नो प्रस्ताव खारेज भइसकेपछि राजीनामा दिनुपर्दैन, आजभोलि त उहाँ झन् अचम्मको कुरा गर्नुहुन्छ, जितेजस्तो कुरा गर्नुहुन्छ,’ प्रचण्डले भने, ‘सर्वोच्चले हराइदिएपछि हामी झन् बलियो भयौं भन्नुहुन्छ। हारेपछि बलियो भइने। कस्तो सिद्धान्त प्रतिपादन गर्न खोजेको होला केपीजीले?’
पूरा देशले नैतिकताका आधारमा राजीनामा दिनुपर्ने भनिरहे पनि अझै देखाइदिन्छु भनेर बोलेर हिँड्दै गरेको देख्दा अचम्म लागेको उनले बताए। ओली अब पार्टी सदस्य पनि नभएकाले संवैधानिक ढंगले एकछिन पनि प्रधानमन्त्री भएर बस्न लायक नभएको प्रचण्डले दाबी गरे।