सर्वोच्चको फैसलाले रोकेको हो प्रधानमन्त्रीलाई राजीनामा गर्नबाट?
प्रकाशित मिति : फाल्गुन १७, २०७७ सोमबार
सरकारका प्रवक्ता एवं सूचना तथा सञ्चार प्रविधिमन्त्री पार्वत गुरुङले सर्वोच्च अदालतको फैसलाले नै प्रधानमन्त्रीलाई राजीनामा गर्नबाट रोकेको दाबी गरेका छन्।
मन्त्रालयमा सोमबार आयोजित पत्रकार सम्मेलनमा मन्त्री गुरुङले सर्वोच्चको फैसला पढ्दै यस्तो बताएका हुन्।
‘अदालतको फैसलाले प्रधानमन्त्रीले संवैधानिक, नैतिकताका हिसाबले जिम्मेवारीबाट भाग्न पाइँदैन, राज्य सन्चालन गर्नु तपाईको दायित्व, जिम्मेवारी हो, संवैधानिक विषय हो भनेर भनेको छ,’ उनले भने, ‘अदालतले नै राजीनामा गर्नुहुँदैन भनेकाले प्रधानमन्त्रीले राजीनामा गर्नुहुन्न।’
उनले सर्वोच्चको फैसलाको पृष्ठ ९ मा यसो भनिएको उल्लेख गरे। गुरुङले प्रधानमन्त्रीले नैतिकताका आधारमा राजीनामा गर्नुपर्छ भन्नेहरुले राजनीतिक ढंगबाट सन्यास लिँदा राम्रो हुने टिप्पणी पनि गरे। ‘नैतिकताको पाठ सिकाउनेहरुले आफू कुन नैतिकताको धरातलमा उठेको छु भनेर एक पटक फर्केर हेर्नुपर्छ,’ उनले भने।
आइतबार राति हिमालय टेलिभिजनसँंगको अन्तर्वार्तामा पनि प्रधानमन्त्री ओलीले सर्वोच्च अदालतले प्रतिनिधिसभा पुनःस्थापना गरे पनि आफूलाई राजीनामा दिन नभनेको बताएका थिए।
उनले भनेका थिए, ‘म राजीनामा लेख्दिन, लेख्नुपर्ने अवस्था पनि होइन। त्यसो भएपछि मैले अरू पनि बाटा समाउन सक्छु। आफूलाई राजीनामाका निम्ति दवाब आइरहेको भए पनि आफू त्यसबाट नभाग्ने बरु अविश्वासको प्रस्ताव फेस गरेर निस्तेज पार्ने उनले बारम्बार दोहोर्याएका छन्।