ओलीले आफूलाई महाराजाधिराज ठाने : प्रचण्ड
प्रकाशित मिति : फाल्गुन १५, २०७७ शनिबार
नेपाल कम्युनिस्ट पार्टी (नेकपा) प्रचण्ड–माधव समूहका अध्यक्ष पुष्पकमल दाहाल ‘प्रचण्ड’ ले केपी शर्मा ओलीले आफूलाई महाराजाधिराज ठानेको आरोप लगाएका छन्। आफ्नो पक्षका शिक्षकहरुको राष्ट्रिय भेलालाई शनिबार ललितपुरमा सम्बोधन गर्दै प्रचण्डले भने, ‘आलोचना सहन नसक्ने, बैठकमा आउनै नपर्ने, अरुका सुन्नु नपर्ने, यस्ता लक्षण महाराजधिराजको हो।’
ओली छोटो समयमै प्रतिगमनको बाटोतर्फ अगाडि बढेको उनले बताए। ‘कम्युनिस्ट पार्टीकै नेतृत्वबाट छोटै समयमा प्रतिगमनको बाटो रोजेर संघीयता, संविधान र गणतन्त्रमाथि निर्मम प्रहार भएको छ,’ उनले भने, ‘संविधानमाथि नै कालो धब्बा लगाउने गरी भएको यो घटना कम्युनिस्टका लागि दुःखद क्षणका रुपमा मैले लिएको छु।’
ओलीकै कारण नेकपा विभाजनको तहसम्म आइपुगेको दाबी गर्दै उनले उक्त समूहसँग एकताको सम्भावना नदेखेको बताए।
आफू जन्मिएको धरातल बिर्सेर गलत काम गर्दै हिँड्ने र आफू नै सर्वेसर्वा भएको ठान्ने प्रवृत्ति सबैभन्दा घातक रहेको उनले बताए।
‘पार्टीभित्रैबाट वर्गउत्थान भएका केही नेताहरू जो विपरीत वर्गको स्वार्थसँग आत्मसमर्पण गर्छन्, उनीहरूको प्रलोभनमा फस्छन् र उनीहरूका एजेन्ट हुन्छन् र आफ्नो वर्गलाई धोका दिन्छन्’ उनले भने, ‘आफू जहाँबाट जन्मिएको हो, त्यो धर्ती उनीहरूले बिर्सिन्छन् र आफूलाई हिजो जसका विरुद्ध लडाइँ गरेको हो हिजो जसका विरुद्ध विद्रोह गरेको हो, त्यही वर्गको प्रतिनिधिजस्तो ठान्न पुग्छन्।’
कम्युनिष्ट पार्टीकै नेतृत्वमा बनेको संविधान र त्यसको मर्ममाथि प्रधानमन्त्रीबाट प्रहार हुनु नै सबैभन्दा दुःखद् रहेको उनको भनाइ छ। अध्यक्ष दाहालले सम्पूर्ण लोकतान्त्रिक गणतन्त्रात्मक व्यवस्थालाई नै उल्ट्याउने दिशातिर प्रधानमन्त्री लागेको आरोप लगाए।