संसद पुनःस्थापनापछि सरकार झन् बलियो भएको छ : नेम्वाङ
प्रकाशित मिति : फाल्गुन १५, २०७७ शनिबार
नेपाल कम्युनिष्ट पार्टी (नेकपा) को ओली समूहका नेता सुवास नेम्वाङले संसद पुनःस्थापनापछि सरकार झन् बलियो भएको दाबी गरेका छन्। ओली समूहनिकट सिन्धुपाल्चोक–काठमाडौं सम्पर्क मञ्चले शनिबार काठमाडौंमा गरेको प्रशिक्षण कार्यक्रमलाई सम्बोधन गर्दै नेम्वाङले यस्तो बताएका हुन्।
प्रतिनिधि सभा विघटन भएपछि सरकारलाई कामचलाउ भन्नेहरुलाई अहिले सरकार दह्रो हुँदा अप्ठेरो परेको उनको टिप्पणी छ। नेम्वाङले सरकारले प्रस्तावको सामना गर्ने पनि बताए। ‘अविश्वास प्रस्ताव फेल भएमा सरकार फेरि एक वर्ष चल्न पाउने व्यवस्थाले विपक्षीहरुलाई प्रस्ताव ल्याउन नै डर लागेको छ,’ उनले भने।
उनले कानुनी रुपमा नेकपा विभाजन भइनसकेको र अहिले पनि पहिलो अध्यक्ष केपी ओली र दोस्रो अध्यक्ष प्रचण्ड कायम नै रहेको बताए। पार्टी एकीकृत भएपछि निर्वाचन आयोगलाई दिएको कागजमा नै पहिलो अध्यक्ष ओली र दोस्रो अध्यक्ष प्रचण्ड भनेर लेखिएको उनको दाबी छ।
उनले पार्टीले कसैलाई कारबाही नगरेको र एकताको पक्षमा रहेको पनि बताए।