संसदमा अविश्वासको प्रस्ताव सामना गर्ने तयारीमा प्रधानमन्त्री
प्रकाशित मिति : फाल्गुन १४, २०७७ शुक्रबार
राजीनामाको दबाब बढिरहेका बेला प्रधानमन्त्री केपी ओली संसदमा अविश्वासको प्रस्तावको सामना गर्ने तयारीमा अगाडि बढेका छन्। त्यसैको तयारीस्वरुप उनले नेकपाको प्रमुख सचेतक रहेका प्रचण्ड–माधव पक्षका देव गुरुङलाई शुक्रबार बर्खास्त गरेर विशाल भट्टराई नियुक्त गरे।
दुवै पक्षबीच एक अर्का पक्षका सांसदलाई आफूतिर तान्ने प्रयास भइरहेका बेला ओली भने अविश्वासको प्रस्ताव पारित नहुनेमा ढुक्क भएजस्तै देखिएका छन्। शुक्रबार प्रदेश १ का सांसदसँग उनले अझै २ वर्षसम्म आफू नै प्रधानमन्त्री हुने भन्दै ढुक्क रहन आग्रह गरे।
‘अझै दुई वर्ष मैले नै सरकार चलाउने हो। स्थायी सरकार हो। बीचमै राजीनामा दिएर छोड्न मिल्दैन। राजीनामा दिने कल्पना नै नगर्नुस्,’ ओलीले भने ।
ओलीपक्षले आफ्नापक्षमा १ सय २० सांसद पुग्ने दाबी गरेको छ। शुक्रबार नै सांसद माया ज्ञवाली ओलीपक्षतिर लागेकी छन्। उता उपप्रधानमन्त्री एवं ओली समूहका सचिवालय सदस्य इश्वर पोखरेलले पनि प्रधानमन्त्रीले इश्वर पोखरेलले पनि प्रधानमन्त्रीले संसदमा डटेर सामना गर्ने बताएका छन्।
पार्टीनिकट अनेरास्ववियुको बृहत् कार्यकर्ता भेलालाई सम्बोधन गर्दै उनले ओलीले कसैले राजीनामा माग्दैमा नदिने र संसद्को सर्वोच्चतालाई मानेर संसदमै सामना गर्ने बताउनुभयो ।
‘प्रधानमन्त्रीले अविश्वासको सामना गर्नुहुन्छ,’ उनले भने, ‘नेकपाले लोकतान्त्रिक विधिबाट आउने सबैको सामना गर्छ।’ उक्त कार्यक्रममा ऊर्जामन्त्री एवं नेकपा स्थायी कमिटी सदस्य टोपबहादुर रायमाझीले आफ्नो पार्टी निर्वाचनमा जाने र संसद्को सामना गर्ने दुवै विकल्पमा सक्षम रहेको बताए।