सर्वोच्च अदालतले धर्म निर्वाह गरेको छ : पूर्वराष्ट्रपति यादव
प्रकाशित मिति : फाल्गुन १३, २०७७ बिहीबार
पूर्वराष्ट्रपति डा रामवरण यादवले संविधान र लोकतन्त्र रक्षाका लागि सर्वोच्च अदालतले आफ्नो धर्म निर्वाह गरेको बताएका छन्। उनले लोकतन्त्र रक्षा गरी संविधान कार्यान्वयनका लागि अदालत र निर्वाचन आयोग निष्पक्ष हुनुपर्ने बताए।
नेपाली कांग्रेस जिल्ला कार्यसमिति धनुषाले जनकपुरमा बिहीबार आयोजना गरेको महेन्द्रनारायण निधिको ९९औँ जन्मजयन्ती समारोहलाई सम्बोधन गर्दै पूर्वराष्ट्रपति डा यादवले भने, ‘संसद् विघटन बदर गर्ने सर्वोच्च अदालतको फैसलाले संविधान मजबुत बनाएको छ। अब लोकतन्त्र रहेसम्म कसैले पनि पाँच वर्षसम्म संसद् भंग गर्न सक्दैन। म संविधानलाई बचाउने अदालतलाई धन्यवाद तथा फैसलाको लागि सम्मान गर्न चाहन्छु।’
डा यादवले अदालतको फैसलाले लोकतन्त्रमा विश्वास गर्नेलाई खुसी दिएको बताउँदै भने, ‘लोकतन्त्र, गणतन्त्र, सङ्घीयतामा विश्वास गर्ने, समावेशितामा विश्वास गर्ने खुसी भएका छन्।’
उनले संविधान जारी गर्दाको समयको स्मरण गर्दै भने, ‘मैले संविधान जारी गर्दा देशका सबै नागरिक खुसी होउन् भन्ने चाहेको थिएँ तर त्यतिबेला मधेशवादी दल छाडेर तत्कालीन नेकपा (एमाले), कांग्रेस, माओवादी सबै गरी ९० प्रतिशतको सहभागिता थियो र त्यसैलाई शिरोधार्य गर्दै अगाडि बढ्दै संविधान जारी गरेँ ।’
त्यसबेला मधेशी दलले संविधानप्रति आपति जनाए पनि यही संविधानअनुसार भएको निर्वाचनमा मधेशी दललेसमेत सहभागिता जनाएर भाग लिएपछि आफूले ठीकै गरेको अनुभूति भएको डा यादवले बताए। उनले भने, ‘मधेशी दल पनि सरकारमा गयो । चुनाव भयो र अगाडि बढिरहेको छ।’
पूर्वराष्ट्रपति डा यादवले भारतमा संविधान घोषणा हुन लाग्दा भीमराव अम्बेडकरले संविधान राम्रो र खराब नहुने तथा अगुवा ठीक रहे संविधान राम्रै बाटोबाट जाने भनी दिएको अभिव्यक्तिको स्मरण गर्दै भारतको संविधान १२२ पटक संशोधन भएको र अमेरिकामा २२ पटक संशोधन भइसकेको उदाहरणसमेत दिए।
उनले राजनीतिक दल विधि र प्रक्रियाअनुसार नचलेको हुँदा चिरा परेकाले मुलुकमा समस्या आएको बताए। उनले आर्थिक अनुशासन कुनै पनि दलमा नभएको बताउँदै विधानअनुसार पार्टी नचले, नेता, कार्यकर्ताको आचरण ठीक नभए लोकतन्त्र खतरामा पर्ने बताए। उनले भने, ‘अहिले सबै पार्टीको यही हालत छ । लोकतन्त्रका बारेमा पढ्नुस् । बुझ्नुस् र आफूलाई लोकतान्त्रिक आचरणमा ढाल्नुस्।’
उनले नेपालको राजनीति दलमा आर्थिक अनुशासनसमेत नभएको आरोप लगाए।