प्रचण्ड-माधव समूहको निष्कर्ष : यथास्थितिमा ओली समूहसँग एकता गर्न सकिँदैन
प्रकाशित मिति : फाल्गुन १२, २०७७ बुधबार
नेपाल कम्युनिस्ट पार्टी (नेकपा) को प्रचण्ड–माधव समूहले यथास्थितिमा ओली समूहसँग एकता गर्न नसकिने निष्कर्ष निकालेको छ। आत्मालोचनसहित रुपान्तरण नभएसम्म ओलीसमूहसँग एकता गर्न नसकिने निष्कर्ष समूहको छ।
पार्टी कार्यालय पेरिसडाँडामा बुधबार बसेको स्थायी कमिटीको बैठकले सबै नेता कार्यकर्तालाई आ–आफ्नो जिम्मेवारीमा फर्कन पनि आव्हान गरेको छ।
‘कतिपय साथीहरू भ्रममा परेर मूलपार्टी छोडेर फुटवादी र प्रतिगामी गुटमा लाग्नु भएको छ,’ बैठकपछि सञ्चारकर्मीसँग कुरा गर्दै प्रवक्ता नारायणकाजी श्रेष्ठले भने, ‘सबैलाई आ–आफ्नो जिम्मेवारी लिन आह्वान गर्ने बैठकले गरेको छ।’
प्रतिनिधिसभा विघटनको असंवैधानिक कदम चालेका प्रधानमन्त्री ओलीले नैतिकताको आधारमा तत्काल राजीनामा दिनुपर्ने प्रवक्ता श्रेष्ठले बताए।
‘उहाँले चालेको असंवैधानिक कदमलाई सर्वोच्च अदालतले बदर गरिदिएको छ,’ श्रेष्ठले भने,‘प्रधानमन्त्रीले नैतिकताका आधारमा राजीनामा दिनुपर्छ। राजीनमा नदिएको खण्डमा संविधानअनुसार अघि बढ्ने निर्णय बैठकले गरेको छ।’
सर्वोच्च अदालतको फैसलालाई ऐतिहासिक ठहर गर्दै बैठकले प्रतिनिधिसभा पुनःस्थापनाको निर्णयपछि संविधान र लोकतन्त्रको रक्षासमेत भएको निष्कर्ष निकालेको छ। सो समूहले लोकतान्त्रिक शक्तिसँग सहकार्य गर्ने निर्णय पनि गरेको छ।