पशुपतिमा जलहरी राखेपछि सर्वोच्चको अन्तरकालीन आदेश–छलफलको टुंगो नलागेसम्म नराख्नू
प्रकाशित मिति : फाल्गुन १२, २०७७ बुधबार
राष्ट्रपति विद्यादेवी भण्डारी बुधबार मध्यान्ह पशुपतिनाथ मन्दिर पुगिन्। उनी त्यहाँ पुग्नुको उद्धेश्य थियो–४ दिनदेखि भइरहेको क्षमापुजामा राष्ट्रप्रमुखका तर्फबाट गरिने संकल्प पुजा गर्नु। उनले पशुपतिमा आधा घण्टा बिताइन् पनि।
पशुपतिमा जलहरी राख्नका लागि ४ दिनदेखि भइरहेको क्षमापुजाको अन्तिम दिन बुधबार थियो। क्षमापुजाका क्रममा मंगलबार जलहारी राखिसकिएको छ।
पशुपतिमा जलहरी राख्न केही समयअघि प्रधानमन्त्री केपी ओलीले ३० करोड रुपैयाँ दिने घोषणा गरेका थिए। यसका लागि पशुपति क्षेत्र विकास कोषले ६५ करोड रुपैयाँ हालेको छ भने नपुग रकम दाताबाट जुटाउने कोषले जनाएको छ।
जलहरी राखेको भोलिपल्ट बुधबार सर्वोच्च अदालतले एउटा अन्तरकालीन आदेश जारी गर्यो, जसमा भनिएको छ–जलहरी नराख्नू।
प्रदेशसभा सदस्य एवं पशुपति क्षेत्र विकास कोषका पूर्व कोषाध्यक्ष नरोत्तम वैद्य र अधिवक्ता नितीका ढुंगानाले दायर गरेको अलग–अलग रिटमाथि सुनुवाइ गर्दै न्यायाधीश पुरुषोत्तम भण्डारीको एकल इजलासले तत्काल पशुपतिनाथ मन्दिरमा जलहरी लगाउने कार्य नगर्नु भनी अन्तरकालीन अन्तरिम आदेश जारी गरेको हो।
आदेशमा अन्तरिम आदेश दिने या नदिने विषयमा छलफल गर्न दुवै रिट निवेदक र सरकार दुवै पक्षलाई फागुन १७ गते छलफलका लागि बोलाइएको छ ।
सर्वोच्च अदालतले विपक्षीका नाममा सुनको नयाँ जलहरी राख्नुको लिखित कारण पनि सरकारसँग माग गरेको छ ।
