निर्धारित समयमै संसद बैठक बोलाउने ओलीपक्षीय स्थायी कमिटीको निर्णय
प्रकाशित मिति : फाल्गुन १२, २०७७ बुधबार
नेपाल कम्युनिष्ट पार्टी (नेकपा) को ओलीपक्षले सर्वोच्च अदालतको आदेशअनुसार निर्धारित समयमै प्रतिनिधिसभाको अधिवेशन आव्हान गर्ने निर्णय गरेको छ। प्रतिनिधिसभा पुनःस्थापना गर्ने सर्वोच्चको फैसलाको भोलिपल्ट बुधबार बसेको स्थायी कमिटी बैठकले उक्त निर्णय गरेको हो।
सर्वोच्च अदालतले मंगलबार प्रतिनिधिसभा पुनःस्थापनाको फैसला गर्दै १३ दिनभित्र बैठक बोलाउन आदेश जारी गरेको छ।
बैठकले सर्वोच्च अदालतको फैसला कार्यान्वयन गर्ने निर्णय पनि गरेको छ। ‘अदालतको फैसला, त्यसको प्रभाव र कार्यान्वयनका पक्षमा केन्द्रित रहेर बैठका छलफल गरियो, नेकपा विधिको शासनमा विश्वास गर्ने पार्टी भएकाले हिजोको फैसलालाई कार्यान्वयन गर्ने निर्णय गरेका छौं,’ बैठकपछि सो समूहका प्रवक्ता एवं परराष्ट्रमन्त्री प्रदीपकुमार ज्ञवालीले भने।
उनले फैसला सधैं अपेक्षित हुन्छन् र वाञ्छित परिणाम दिन्छन् भन्ने नभएको उल्लेख गर्दै भने, ‘मुलुकमा स्थिर सरकार, स्थायी नीति, बलियो राजनीतिक स्थिरतालाई अदालतको फैसलाले बल पु¥याउँछ या भोलि अस्थिरतातिर जान्छ भन्नेबारे पर्खिनुपर्ने स्थिति छ, त्यो नहोस्।’
स्थायी कमिटी बैठकले छिट्टै केन्द्रीय समिति र संसदीय दलको बैठक बोलाउने निर्णय गरेको छ। यस्तै, देशका विभिन्न ठाउँमा राखिएका कार्यक्रमलाई स्वरुप परिवर्तन गर्दै निरन्तरता दिने पनि ज्ञवालीले बताए।
प्रधानमन्त्रीले राजीनामा दिनुहुन्छ ? भनी सोधिएको प्रश्नमा उनले तत्काल राजीनामा नदिने संकेत गरे। उनले भने, ‘अन्य दलहरुसँग छलफलमा छौं, मुलुकलाई अन्योलमा राख्नुहुँदैन भन्ने हाम्रो भनाइ हो, जे गर्दा देशलाई राम्रो हुन्छ, त्यो प्रधानमन्त्रीले गर्नुहुन्छ।’