कहाँ-कहाँ बनाइँदैछ कोरोनाको खोप भण्डारण गृह?
प्रकाशित मिति : फाल्गुन १०, २०७७ सोमबार
सरकारले देशका आठ स्थानमा कोभिड–१९ विरुद्धको खोप भण्डारण गृह निर्माण गर्ने भएको छ। कोरोना खोप सुरक्षित एवं उचित व्यवस्थापन गर्नका लागि सहरी विकास मन्त्रालयले सातवटै प्रदेशमा एक/एक वटा तथा एउटा केन्द्रीयस्तरमा भण्डारण गृह निर्माणको कार्यलाई अगाडि बढाएको हो ।
सोहीअनुसार प्रदेश १ को विराटनगरस्थित प्रदेश ल्याब बनाउने स्थानमा, प्रदेश २ को जनकपुरस्थित ग्रामीण विकास प्रशिक्षण केन्द्रको परिसरमा, बागमती प्रदेशको राजधानी हेटौँडास्थितमा कीटजन्य रोग अनुसन्धान तथा तालीम केन्द्रको परिसरमा तथा गण्डकी प्रदेशको स्वास्थ्य कार्यालय कास्कीको परिसरमा भण्डारण गृह निर्माण गरिदैछ।
त्यस्तै लुम्बिनी प्रदेशको बुटबल उपमहानगरपालिका–१२, तामनगरमा, कर्णाली प्रदेशको सुर्खेतस्थित स्वास्थ्य निर्देशनालयको परिसरमा, सुदूरपश्चिम प्रदेशको धनगढीस्थित स्वास्थ्य तालीम केन्द्रको परिसरमा भण्डारण गृह निर्माण हुँदैछ। केन्द्रीय भण्डारण गृह पथलैया मेडिकल स्टोरको परिसरमा बन्दैछ।
प्रति भण्डारण गृह एक करोड २० लाखका दरले आठ वटा भण्डारण गृह निर्माणमा कुल नौ करोड साठी लाख रुपैयाँ खर्च हुने जनाइएइका छ।
प्रदेश–२, कर्णाली प्रदेश तथा सुदूरपश्चिम प्रदेशअन्तर्गत निर्माण हुने खोप भण्डारण केन्द्रको ठेक्का सम्झौता भएर कार्यादेश दिइसकिएको छ भने प्रदेश १ तथा लुम्बिनी प्रदेशअन्तर्गत निर्माण हुने भण्डारण गृहको बोलपत्र स्वीकृत भई कार्य सम्झौता गर्न पत्राचार भइसकेको जनाइएको छ।
बाग्मती प्रदेश, गण्डकी प्रदेश तथा केन्द्रीय भण्डारण गृहको बोलपत्र स्वीकृत गरी आशयको सूचना प्रकाशन भएको भवन विभागले जनाएको छ। कार्यादेश दिएको दुई महिनाभित्र निर्माण सम्पन्न हुने जनाइएको छ।
सरकारले भारतको सेरम इन्सिच्यट अफ इण्डियासँग किनेको २० लाख डोजमध्ये १० लाख डोजको पहिलो खेप गत आइतबार आइपुगेको छ भने १० लाख डोज चाँडै आउने बताइएको छ। यसअघि भारतले १० लाख डोज उपहार दिएको थियो। दोस्रो चरणको खोप अभियान फागुन २३ बाट सुरु गरिने र ६० वर्षमाथिका नागरिकलाई प्राथमिकता दिइने सरकारले जनाएको छ।