प्रदेश २ प्रमुखलाई किन स्वागत गरेनन् मुख्यमन्त्री राउतले?
प्रकाशित मिति : फाल्गुन ९, २०७७ आईतबार
प्रदेश २ प्रमुखको रुपमा नियुक्ति पाएर जनकपुर जाँदा २० कात्तिक २०७६ का दिन तिलक परियारले भव्य स्वागत पाए। सो दिन उनलाई उपप्रधानमन्त्री उपेन्द्र यादव, मुख्यमन्त्री लालबहादुर राउतसहित प्रदेशका मन्त्रीहरु पुगेका थिए।
तर १६ महिनापछि जनकपुर विमानस्थलको दृश्य भने फरक थियो। तिलक परियारलाई सरकारले बर्खास्त गरेसँगै प्रदेश प्रमुखको नियुक्ति पाएर कार्यभार सम्हाल्न जनकपुर पुगेका राजेश झालाई स्वागत गर्न न मुख्यमन्त्री पुगे, न प्रदेशको सत्ता सम्हालिरहेको जनता समाजवादी पार्टी। यसपटक झालाई नेकपाको ओली पक्षका केही कार्यकर्ताहरुले माला लगाएर स्वागत गरे। उनलाई मन्त्री सरोजसिंह कुशवाहाले स्वागत गरेका थिए।
प्रदेश सरकारलाई सहयोग गरिरहेका परियारलाई एक्कासी केन्द्रले बर्खास्त गर्दा प्रदेश सरकार असन्तुष्ट त थियो नै, सँगै बारम्बार संघीयताविरोधी अभिव्यक्ति दिएका झालाई प्रदेश प्रमुखको जिम्मेवारी दिइएपछि असन्तुष्टि चर्किएको हो।
प्रदेशका आन्तरिक मामिला तथा कानुनमन्त्री ज्ञानेन्द्र यादवले त संघीयताविरोधी छवि बनाएका झालाई पठाएर प्रधानमन्त्री केपी ओलीले द्वन्द्व निम्त्याउने षडयन्त्र गरेको टिप्पणी गरेका छन्। संघीयता कमजोर गर्ने उद्देश्यका साथ झालाई प्रदेश २ को प्रमुखमा नियुक्त गरिएको उनको भनाइ छ। उनले झाको कार्यशैलीबाट मात्र प्रदेश सरकार सहयोग वा असहयोगको निर्णयमा पुग्ने बताएका छन्।