भेटिएनन् टेक्सासमा ८० जना ट्रकभित्र कोचिएको र स्वास फेर्न नसकेको भन्दै प्रहरीलाई फोन गर्नेहरु
प्रकाशित मिति : माघ २९, २०७७ बिहीबार
टेक्सासमा ८० जना ट्रकभित्र कोचिएको र स्वास फेर्न नसकेको भन्दै प्रहरीलाई फोन गर्नेहरु अझै नभेटिएको जनाइएको छ । सोमबार ९११ मा आएको एउटा फोनमा आफूहरु झण्डै ८० जनालाई एउटा ट्रकभित्र कोचेर राखिएको र स्वास फेर्न अक्सिजन नभएको बताइएको थियो ।
स्पानिस भाषामा पुरुषले गरेको उक्त फोनकलका क्रममा पृष्ठभूमिमा केही व्यक्तिले गुहार मागेको र भगवानसँग प्राथना गरेको आवाज समेत सुनिएको थियो । स्वास फेर्न कठिन भएको जस्तो पृष्ठभूमिमा आवाज आएको समेत जनाइएको छ । अरु केही व्यक्ति चिच्याउँदै स्पानिस भाषामा सहयोग मागिरहेको आवाज आएको थियो ।
उक्त फोन सोमबार आएपनि प्रहरीले अहिलेसम्म कसैलाई फेला पार्न र उद्दार गर्न सकेको छैन । इमिग्रेशन एण्ड कस्टम इन्फोर्समेन्ट आइसले सम्भावित मानव तस्करीको घटनाबारे अनुुसन्धान गरिरहेको जनाएको छ । टेक्सासमा खोजी कार्य बढाइएपनि अहिलेसम्म केही भेटिएको छैन ।
अधिकारीहरुले ट्यांक ट्रकको खोजीका लागि सर्वसाधारणहरुको सहयोग मागेका छन् । उक्त ट्रकभित्र कोचिएका केही व्यक्तिको मृत्यु भइसकेको हुनसक्ने रिपोर्ट टेलिमुण्डोले प्रकाशित गरेको छ ।
सान एन्टोनियो समेत कार्यक्षेत्र रहेका बेक्सर काउन्टीका प्रहरी अधिकारी हाभियर सालाजारले आफू ट्रकमा भएका व्यक्तिलाई पक्राउ गर्न उत्सुक नरहेको बरु उनीहरु सकुशल भए नभएकोबारे चिन्तित भएको बताएका छन् ।
मेक्सिकोबाट गैरकानूनी रुपमा अमेरिका छिर्न खोज्दा सिमाक्षेत्रमा पक्राउ पर्नेहरुको संख्या बृद्धि भइरहँदा यो समाचार आएको हो । जनवरीमा मात्र झण्डै ७८ हजार सिमाक्षेत्रमा पक्राउ परेका थिए । जुन गतमहिनाको तुलनामा ६ प्रतिशतले बृद्धि हो ।