झाँक्रीलाई पक्रन गलत कानून प्रयोग भएको कानूनविदको भनाई, के छ दफा ५८ मा ?
प्रकाशित मिति : माघ २९, २०७७ बिहीबार
नेपाल कम्युनिष्ट पार्टीको प्रचण्ड नेपाल समूहकी नेता रामकुमारी झाँक्रीलाई बिहिबार पक्राउ गरियो ।
राष्ट्रपतिको बारेमा अपमानजक शब्द बोलेको भन्दै झाँक्री राज्यविरूद्धको कसूर गरेको आरोपमा पक्राउ गरिएको थियो । प्रहरीले मुलुकी अपराध संहिताको दफा ५८ अनुसार राज्यविरूद्धको कसूर गरेको अभियोगमा पक्राउ गरेको थियो ।
उक्त दफाको १ नम्बरमा भनिएको छ – ‘कसैले नेपालको राष्ट्रपति वा संसदलाई संविधान तथा कानून बमोजिम गर्नुपर्ने कार्य सम्पादन गर्नबाट रोक लगाउन वा बञ्चित गर्न वा खास तरिकाबाट कार्य सम्पादन गर्न बाध्य गराउन कुनै किसिमको बल प्रयोग गरी वा नगरी कुनै किसिमको धम्की दिन, डर वा त्रास देखाउन वा अन्य कुनै किसिमले दबाव दिन हुँदैन ।’
साथै उक्त दफाको दुई नम्बरमा भनिएको छ – ‘उपदफा १ बमोजिमको कसूर गर्ने वा गराउने व्यक्तिलाई सात बर्षसम्म कैद वा सत्तरी हजार रुपैयाँसम्म जरिवाना वा दुबै सजाय हुनेछ ।’
कानुनविदहरुले गलत कानुन प्रयोग गरेर झाँक्रीलाई पक्राउ गरिएको बताएका छन् । उनले भनेको यो कुराले राज्यविरूद्धको कसुरको दफा ५८ आकर्षित नहुने कानुन व्यवसायी टीकाराम भट्टराईको भनाई छ । त्यस्तै संविधानविद् भीमार्जुन आचार्यले झाँक्रीको अभिव्यक्तिमा कुनै व्यक्तिगत लाञ्छना भए त्यसमा गाली बेइज्जतीसम्बन्धी कानुन आकर्षित हुने बताए ।
बोलेकै भरमा कुनै नागरिकमाथि राज्यविरूद्धको कसुर लगाउने हो भने अहिलेको प्रधानमन्त्रीको कदमविरूद्ध बोल्नै लाखौं मानिस जेल जाने आचार्यले बताए।
अखिल नेपाल महिला संघको उजुरीका आधारमा उनलाई सोधपुछका लागि पक्राउ गरिएको श्रीमानको जिम्मा लगाएर छाडिएको प्रहरीले जनाएको छ ।
झाँक्रीलाई के के विषयमा सोधपुछ गरिएको थियो? हेर्नुहोस् ।
पढ्नोस, बुझ्नोस र धारणा बनाउनोस् । #राज्य_विरुद्धको_कसुर ? pic.twitter.com/8WjQA6JfD0
— Dipendra Kunwar (@MaDipendra) February 11, 2021