उडान रद्द गर्ने बाइडेन प्रशासनको आदेश विपरित २२ बालबालिकासहित ७२ देशनिकाला
प्रकाशित मिति : माघ २७, २०७७ मंगलबार
डिपार्टमेन्ट अफ होमल्याण्ड सेक्युरिटीमा अलेहान्द्रो मेयरकास सेक्रेटरीमा नियुक्त भएलगत्तै आइसले तय गरेका देशनिकालाका उडानहरु रद्द गर्न निर्देशन दिएका थिए । तर उक्त निर्देशनको बाबजुत पनि सोमबार आइसले अमेरिकाबाट २२ जना बालबालिकाहरुसहित ७२ जनालाई देशनिकाला गरेको छ ।
सोमबार आइसले दुईवटा चार्टड विमानहरु हैटी पठाएको र त्यसमा २२ जना बालबालिबाहरुसहित ७२ जना रहेको रिपोर्ट गार्डियनले प्रकाशित गरेको छ । देशनिकाला हुनेमा २ महिनाको बच्चा समेत रहेको जनाइएको छ । टेक्सासको लारेडोबाट आप्रवासीहरुलाई लिएर आइसले चार्टड गरेको विमान हैटी प्रस्थान गरेको हो ।
बाइडेन प्रशासनले राष्ट्रिय सुरक्षामा खतरा रहेकाहरुलाईमात्र देशनिकाला गर्न आइसलाई निर्देशन दिएपनि आइसले २ महिनाको बच्चासहितका २२ जना बालबालिकाहरुलाई देशनिकाला गरेकोमा अधिकारकर्मीहरुले आक्रोश व्यक्त गरेका छन् । जोखिमपूर्ण अवस्थामा रहेका बालबालिकाहरुलाई राजनीतिक अस्थीरता र अराजकता फैलिएको हैटीको राजधानीमा पठाइएको हो ।
गत बिहिबार तय भएका दुईवटा देशनिकालाका उडानहरु भने रद्द गरिएको थियो । उनीहरुलाई जनस्वास्थ्य सम्बन्धित नियम अनुशार देशनिकाला गर्न लागिएको थियो । यो प्रावधान ट्रम्प प्रशासनभन्दा अगाडि खासै प्रयोग भएको थिएन ।
बाइडेन प्रशासनले एकसयदिनसम्म देशनिकाला स्थगन गर्ने घोषणा गरेपनि उक्त घोषणा कार्यान्वयनमा अदालतले रोक लगाएको छ । तर अदालतले अहिले देशनिकाला गर्नैपर्ने कुनै बाध्यकारी आदेश भने दिएको छैन । बिहिबार बाइडेन प्रशासनले देशनिकालाका उडानहरु रद्द गर्न आइसलाई निर्देशन दिएपछि आइसमाथि बाइडेन प्रशासनको नियन्त्रण कायम भएको विश्वास गरिएको थियो ।
गतसाता न्युयोर्कका वित्तिय परामर्शदाता पउल पियरलसलाई आइसले उनीसँग सम्बन्धित नरहेको देश हैटीमा देशनिकाला गरेको थियो । पउल हैटीका नागरिक नभएको र उक्त देशमा कहिलेपनि नगएको जनाइएको छ ।
ट्रम्प प्रशासनले पउललाई जनवरीमा अमेरिकाबाट देशनिकाला गर्न खोजेको थियो । तर न्युयोर्कका एकजना सांसद र आप्रवासी अधिकारकर्मीहरुको सहयोगमा उनलाई देशनिकाला हुनबाट बचाइएको थियो । तर अहिले कसैलाई थाहा नदिई उनलाई हैटी पठाइएको थियो ।
हैटीमा देशनिकाला गरिएका पउल फ्रान्सको क्यारेबियन भूभाग सेन्ट मार्टिनमा जन्मिएको तर उनी बाल्यकालमा नै अमेरिका आएकाले फ्रान्सले पनि आफ्नो नागरिकका रुपमा नमानेको जनाइएको छ ।
पउल सन् २००३ मा लागुऔषधको कारोबारमा दोषी ठहरिएका थिए । उनले आफ्नो अपराधको सजाय काटेपछि अध्यगमन न्यायाधिसले उनलाई देशनिकालाको आदेश दिएका थिए । हैटीका राजदूतले यसअगाडि गरेको ट्वीटमा पउल हैटीका नागरिक नभएको र उनलाई देशनिकाला गरेर हैटी पठाउन नसकिने बताएका थिए ।