न्युयोर्क सिटीमा इन्डोर डाइनिङ शुक्रबारदेखि नै
प्रकाशित मिति : माघ २६, २०७७ सोमबार
न्युयोर्क सिटीमा इन्डोर डाइनिङ फेबु्रअरी १२ शुक्रबारदेखि नै सुरु हुने भएको छ । यसअगाडि उक्त मिति फेब्रुअरी १४ आइतबारका लागि तय गरिएको थियो । तर शुक्रबारदेखि इन्डोर डाइनिङ २५ प्रतिशत क्षमतामामात्र संचालन गर्न अनुमति दिइनेछ ।
भ्यालेन्टाइन्स डेमा रेष्टुरेण्टहरुलाई विजनेशमा सहयोग पुगोस् भन्ने उद्देश्यले दुईदिन अगाडि नै २५ प्रतिशत क्षमतामा इन्डोर डाइनिङ संचालनका लागि अनुमति दिइएको गभर्नर एन्ड्रयु कुमोले बताएका छन् । न्युयोर्क सिटीमा गत डिसेम्बरको दोश्रो सातादेखि इन्डोर डाइनिङ बन्द रहँदै आएको थियो ।
इन्डोर डाइनिङ बन्द भएका कारण न्युयोर्कको ज्याक्सनहाइटमा रहेका केही नेपाली रेष्टुरेण्टहरु बन्द भएका छन् । ज्याक्सनहाइटमा रहेको पहिलो नेपाली रेष्टुरेण्ट हिमालयन याक डिसेम्बरदेखि नै अस्थायीरुपमा बन्द भएकोमा अब शुक्रबारदेखि २५ प्रतिशत क्षमतामा खुल्ने तयारी भएको छ ।
त्यस्तै उडसाइडमा रहेको उडसाइड क्याफेपनि केहीदिन अगाडिदेखि अस्थायीरुपमा बन्द भएको थियो ।
ज्याक्सनहाइटमा रहेको ब्याम्बु हाउस एण्ड बार पनि केही महिनादेखि बन्द रहेको छ । उक्त रेष्टुरेण्ट कहिलेदेखि संचालनमा आउने अझै निश्चित छैन ।
त्यस्तै आगामी सोमबारदेखि न्युयोर्कमा कोरोनाबिरुद्धको भ्याक्सिनका लागि थप व्यक्ति योग्य हुने भएका छन् । पहिलेदेखि नै स्वास्थ्य समस्या भएका १६ बर्षमाथिका न्युयोर्कबासीहरु कोरोनाबिरुद्धको भ्याक्सिनका लागि योग्य हुनेछन् ।
न्युयोर्क सिटीमा आइतबारको तथ्यांक अनुशार कोरोना संक्रमण दर ४ दशमलव ८ प्रतिशत रहेको छ । कुल १ लाख १० हजार २ सय ३५ को परीक्षण गरिएकाहरुमध्ये यो दरमा संक्रमितहरु पाइएको हो ।
न्युयोर्कको क्वीन्समा २६ हजार १ सय ६७ जनाको परीक्षण गरिएकोमा १३ सय ६ जना अर्थात् ५ प्रतिशत संक्रमित पाइएको थियो । त्यस्तै ब्रोंक्समा १५ हजार २ सय ९० जनाको परीक्षण गरिएकोमा १ हजार १४ जना अर्थात् ६ दशमलव ६ प्रतिशत संक्रमित पाइएको थियो ।
त्यस्तै म्यानहटनमा २२ हजार ४ सय ३९ जनाको परीक्षण गरिएकोमा २ दशमलव ९ प्रतिशत अर्थात् ६ सय ५६ जनामा संक्रमण पाइएका थियो । बु्रकलिनमा २३ हजार ६ सय ७० मा परीक्षण गरिएकोमा ५ दशमलव ३ प्रतिशत अर्थात् १२ सय ६१ ज्नामा संक्रमण पाइएको थियो ।