अमेरिकामा जनवरी २२ देखि एकसयदिनसम्म देशनिकाला कार्यान्वयनमा रोक
प्रकाशित मिति : माघ ७, २०७७ बुधबार
आजदेखि सुरु बाइडेन प्रशासनले जनवरी २२ देखि लागु हुने गरी एकसय दिनसम्मका लागि निश्चित प्रकारका देशनिकालाका आदेश कार्यान्वयनमा रोक लगाएको छ । राष्ट्रिय सुरक्षा, सिमा सुरक्षा र जनसुरक्षा लक्ष्यीत निष्पक्ष र प्रभावकारी अध्यागमन कार्यान्वयन प्रणाली भएको सुनिश्चित गर्न निश्चित प्रकारका देशनिकाला कार्यान्वयनमा रोक लगाइएको डिपार्टमेन्ट अफ होमल्याण्ड सेक्युरिटीले जनाएको छ ।
विश्वब्यापी महामारीको बीचमा दक्षिण पश्चिम सिमाक्षेत्रमा कामकारवाहीको चुनौतिसहित डिपार्टमेन्ट अफ होमल्याण्ड सेक्युरिटीलाई आफ्ना श्रोतहरु दवावमुलक चुनौतिको सामना गर्न सक्षम भए नभएको सुनिश्चित गर्न समेत यो स्थगनले मद्दत गर्ने जनाइएको छ । अन्तरिम अवधिमा डिपार्टमेन्ट अफ होमल्याण्ड सेक्युरिटीले अध्यागमन कानुन भने लागु गरिरहने जनाइएको छ ।
आज डिपार्टमेन्ट अफ होमल्याण्ड सेक्युरिटीका कार्यवाहक सेक्रेटरीले मेमोमा हस्ताक्षर गर्दै सीबीपी, आईस र युएससीआईएसलाई अध्यागमन कानुन कार्यान्वयन नीति पुनरावलोकन गर्न र सर्वधारणका लागि अध्यागमन कानुन कार्यान्वयनमा लागि अन्तरिम नीतिहरु बनाउन निर्देशन दिएका हुन् । डिपार्टमेन्ट अफ होमल्याण्ड सेक्युरिटीले अन्तिम प्राथमिकता निर्धारण नगर्दासम्म अन्तरिम नीति बनाएर लागु गर्न भनिएको छ ।
खासगरी अपराधको पृष्ठभूमि भएकाहरुबाहेक अन्यलाई देशनिकालाको प्राथमिकतामा नराख्न बाइडेन प्रशासनले गृहकार्य सुरु गरेको देखिएको छ । ओबामा प्रशासनले अपराधको पृष्ठभूमि नभएका तथा राष्ट्रिय सुरक्षा, सिमा सुरक्षा र जनसुरक्षामा खतरा नरहेकाहरुलाई देशनिकालाको प्राथमिकतामा राखेको थिएन । बाइडेन प्रशासनले नीतिलाई त्यही अवस्थामा लैजान खोजेको देखिएको छ ।