मार्चको सुरुमै नेपाललाई ६ मिलियन डोज कोरोनाबिरुद्धको भ्याक्सिन, वितरण चुनौतिपूर्ण
प्रकाशित मिति : माघ ४, २०७७ आईतबार
❒ मार्चको सुरुमै नेपाललाई झण्डै ६ मिलियन डोज कोरोनाबिरुद्धको भ्याक्सिन कोभिसिल्ड उपलब्ध गराइने, नेपालको जनसंख्याको २० प्रतिशतलाई पुग्ने
❒ भ्याक्सिन उत्पादक चीनको सिनोफार्म र भारत बायोटेक अफ इन्डियाले पनि आफ्ना भ्याक्सिनको प्रयोगको स्वीकृतिका लागि नेपालमा आवेदन
❒ नेपालले ५५ बर्षभन्दा माथिका उमेरका व्यक्ति र स्वास्थ्यकर्मीहरुलाई भ्याक्सिनको पहिलो प्राथमिकतामा राख्ने, ४० प्रतिशत जनसंख्यालाई निशुल्क भ्याक्सिन
❒ भ्याक्सिन वितरणका लागि झण्डै १६ हजार केन्द्रहरु, दुर्गम स्थानमा भ्याक्सिन वितरण चुनौतिपूर्ण
❒ खसोखासमा थप समाचारहरुका लागि यहाँ क्लीक गर्नुहोला ।
आगामी मार्चको सुरुमै नेपाललाई झण्डै ६ मिलियन डोज कोरोनाबिरुद्धको भ्याक्सिन कोभिसिल्ड उपलब्ध गराइने भएको छ । नेपालको औषधि व्यवस्था विभागले सेरम इनिस्च्युट अफ इण्डियाले उत्पादन गरेको उक्त खोपलाई आपतकालीन प्रयोगका लागि शुक्रबार अनुमति दिएको थियो ।
मार्चको सुरुमै नेपालको जनसंख्याको २० प्रतिशतलाई पुग्ने कोरोनाबिरुद्धको खोप प्राप्त हुने स्वास्थ्य मन्त्रालयले जनाएको छ । अरु दुई वटा भ्याक्सिन उत्पादक चीनको सिनोफार्म र भारत बायोटेक अफ इन्डियाले पनि आफ्ना भ्याक्सिनको प्रयोगको स्वीकृतिका लागि नेपालमा आवेदन दिएका छन् ।
कोरोनाबिरुद्धको कोभिशिल्ड खोप भने अक्सफोर्ड युनिभर्सिटीले एस्ट्राजेनेकासँग मिलेर बनाएको खोप हो । यसले भारतमा पनि प्रयोगको लागि अनुमति पाइसकेको छ भने भारतमा ठुलो मात्रामा उत्पादन भैरहेको छ ।
नेपालले ५५ बर्षभन्दा माथिका उमेरका व्यक्ति र स्वास्थ्यकर्मीहरुलाई भ्याक्सिनको पहिलो प्राथमिकतामा राख्ने भएको छ । झण्डै ४० प्रतिशत जनसंख्यालाई निशुल्क भ्याक्सिन उपलब्ध गराउने नेपालले जनाएको छ । कालान्तरमा भ्याक्सिनका लागि रकम तिर्न सक्नेहरुका लागि निजी अस्पताललाई पनि भ्याक्सिन वितरणको अनुमति दिनेबारे विचार भइरहेको स्वास्थ्यमन्त्री हृदयेश त्रिपाठीले बताएका छन् ।
नेपालका स्वास्थ्य अधिकारीहरुले भ्याक्सिन वितरणका लागि झण्डै १६ हजार केन्द्रहरु स्थापना गरेको जनाएका छन् । ती केन्द्रहरुमा चिसो तापक्रममा भ्याक्सिन भण्डारण गर्न सक्ने उपकरणहरु पनि उपलब्ध रहेको जनाइएको छ । तर नेपालका दुर्गम स्थानहरुमा भ्याक्सिन वितरणका लागि भने चुनौतिको सामना गर्नुपर्ने देखिएको छ ।
बाटोको समस्या लगायतका कारण दुर्गम स्थानमा भ्याक्सिन लैजानु निकै चुनौतिपूर्ण रहेको छ । प्रान्त र जिल्लाहरुमा फ्रिजसहितका ट्रकमा भ्याक्सिन डेलिभर गर्ने तयारी भइरहेको तर जिल्लाका कोल्ड सेन्टरहरुबाट दुर्गम स्थानहरुमा भ्याक्सिन लैजानमा भने समस्या हुनसक्ने सरकारको भ्याक्सिन सल्लाहकार समितिका सदस्य डाक्टर श्याम राज उप्रेतीले बताएका छन् ।
नेपालमा पछिल्लो चरणमा उत्पन्न राजनीतिक संकटले पनि भ्याक्सिन वितरणमा समस्या उत्पन्न गर्नसक्ने देखिएको छ ।