सामान्य भनाभनमा लन्डनमा ३५ वर्षीय नेपाली सेफको हत्या
प्रकाशित मिति : पुस २८, २०७७ मंगलबार
❒ लन्डन इस्टकोट स्टेशन अगाडि झगडा हुंदा ३५ वर्षीय विक्रम केसीको हत्या
❒ सामान्य भनाभनमा २१ वर्षीय युवाले कुटपिट गरेपछि घट्नास्थलमै निधन
❒ श्रीमतीलाई फोन गरेर ५ मिनेटमा घर आइपुग्छु भनेका केसी कहिल्यै फर्केनन्
❒ खसोखासमा थप समाचारहरुका लागि यहाँ क्लीक गर्नुहोला ।
लन्डनमा एक नेपाली सेफको हत्या भएको छ । आइतबार राती करिब साढे १० बजे लन्डन इस्टकोट स्टेशन अगाडि झगडा हुंदा ३५ वर्षीय विक्रम केसीको हत्या भएको नेपलिज सेफ एसोसिएसन यूकेका संस्थापक अध्यक्ष कृष्ण तिमल्सेनाले जानकारी दिए ।
सामान्य भनाभनमा एक २१ वर्षीय युवाले कुटपिट गरेपछि उनको घट्नास्थलमै निधन भएको तिमल्सेनाले बताए । ति युवक अहिले प्रहरी हिरासतमा छन् ।
सोसल ढाबा नामक रेष्टुरेन्टमा काम गरेर फर्किरहेका केसी र ति अपरिचित युवाबीच वादविवादपछि झडप भएको जनाइएको छ । झगडाको कारण भने खुल्न सकेको छैन् । प्रहरीले घट्नाबारे अनुसन्धान शुरु गरेको छ ।
‘आफ्नी श्रीमतीलाई फोन गरेर म ५ मिनेटमा घर आइपुग्छु भनेका रहेछन्’, एनआरएनए युरोप उपसंयोजक समेत रहेका तिमल्सेनाले भने, ‘आधा घण्टासम्म पनि श्रीमान नआएपछि श्रीमती स्टेशनतिर निस्कंदा प्रहरी र एम्बुलेन्स आइसकेका रहेछन् । प्रहरीसंग आफ्ना पतिबारे सोधखोज गर्दा प्रहरीले उनको हत्या भएको पुष्टि गरे ।’
स्टेशनबाट केसीको घर करिब दुई मिनेट दुरीमा अवस्थित छ ।
स्वर्गीय केसी भारत, कुवेत हुंदै सन् २००७ तिर तिमल्सेनाकै पहलमा लन्डन आएका थिए । ‘इण्डो चाइनिज’ खानाका सेफ केसीले भेन्यू ५, ब्लु अर्किड आदि रेष्टुरेन्टमा काम गरिसकेका थिए ।
काठमाडौं घर भएका केसी श्रीमती र भाइ बुहारीका साथ लन्डनमा बस्थे । एकजना निर्दोष साथीको हत्याको खबर सुनेपछि बेलायतका नेपाली सेफहरु स्तब्ध भएका छन् ।