अमेरिकामा विजनेशलाई भोलिदेखि दोश्रो चरणको पीपीपी ऋण, नयाँ फारम सार्वजनिक


प्रकाशित मिति : पुस २६, २०७७ आईतबार

अमेरिकामा भोलिदेखि विजनेशहरुलाई तलबको खर्च कभर गर्नका लागि दोश्रो चरणको पीपीपी ऋण उपलब्ध हुने भएको छ । पहिलो चरणमा कम आम्दानी हुने समुदायका लागि संचालित साना बैंक र वित्तिय संस्थाहरुले सोमबारदेखि पहिलो चरणका पीपीपी ऋणका आवेदनहरु स्वीकार गर्न सक्नेछन् । अर्थात् यसपटक कम आम्दानी भएको समुदाय, अल्पसंख्यक समुदाय र आर्थिक रुपमा विपन्न समुदायलाई पहिलो प्राथमिकता दिइएको छ ।

यो श्रेणी अन्तरगत झण्डै १० प्रतिशत ऋणदाता बैंक वा वित्तिय संस्थाहरु योग्य हुनेछन् । त्यसपछि बुधबारदेखि तीनै समुदायका लागि संचालित साना बैंक र वित्तिय संस्थाहरुले गैर नाफामुलक संस्थाहरु र साना विजनेशहरुका लागि दोश्रो चरणको पीपीपी ऋणका आवेदनहरु स्वीकार गर्न सक्नेछन् । पहिलो चरणमा पीपीपी ऋण लिएर प्रयोग गरिसकेका साना विजनेश र गैर नाफामुलक संस्थाले यो चरणमा आवेदन दिन सक्नेछन् ।

त्यसपछि विस्तारै अन्य योग्य ऋणदाता बैंक र वित्तिय संस्थाहरु तथा आवेदकका लागि आवेदन स्वीकार गर्न सुरु गरिने एसबीएले जनाएको छ । तर फरबरी १५ भन्दा अगाडि उनी उनीहरुका लागि समेत आवेदन दिन पाउने सुविधा उपलब्ध हुनेछ ।

पहिलो चरणको तुलनामा ऋण प्राप्त गर्न अलिक लामो समय लाग्नसक्ने जनाइएको छ । आवेदनले ऋण नम्बर प्राप्त गर्नु अगाडि प्रणालीमा केही श्रृंखलाबद्ध स्वचालित परीक्षण पास गर्नुपर्नेछ । त्यसका लागि एकदिनसम्म लाग्न सक्नेछ ।

ऋण सामुदायिक ऋणदातामार्फत उपलब्ध गराउनका लागि केहीदिन लाग्नसक्ने र थप परीक्षणहरु गर्नुपर्ने हुनसक्ने जनाइएको छ । अगाडिको चरणमा जालसाजीका घटनाहरु धेरै भएकाले यसपटक त्यसलाई रोक्न समेत संयन्त्रहरु बनाइएको छ । कैयन साना विजनेशले पहिलो चरणमा समेत ऋण पाउन सकेका थिएनन् ।

दोश्रो चरणको पीपीपी ऋणका लागि नयाँ फारम समेत सार्वजनिक गरिएको छ ।

दोश्रो चरणको पीपीपी ऋण प्राप्त गर्नका लागि मुख्य तीन योग्यताहरु रहेका छन् । ३ सय भन्दा कम कामदार, पहिलो चरणको ऋणको प्रयोग भइसकेको र कुनै क्वार्टरमा आम्दानी अघिल्लो बर्षको तुलनामा २५ प्रतिशतसम्म घटेको विजनेशले ऋण पाउन सक्नेछन् ।

दोश्रो चरणको ऋण ३ सय भन्दा कम कामदार भएका विजनेशले मात्र प्राप्त गर्नेछन् । पहिलो चरणको ऋण भने ५ सयसम्म कामदार भएका विजनेशले प्राप्त गरेका थिए ।

त्यस्तै दोश्रो चरणको अधिकतम ऋण २ मिलियन डलरमात्र रहेको छ । पहिलो चरणमा अधिकतम ऋण १० मिलियनसम्म रहेको थियो । महामारीपछिको कुनै एक क्वार्टरमा आम्दानी अघिल्लो बर्षको तुलनामा २५ प्रतिशतसम्म घटेको देखाउनुपर्नेछ ।

१ लाख ५० हजार डलर वा त्यो भन्दा कम ऋणका लागि आवेदन दिनेले यो विवरण फर्ममा उल्लेख नगरेपनि हुनेछ । तर पछि एसबीएले मागेको खण्डमा भने दिनुपर्नेछ ।

 

 

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com