९४ वर्षीया बेलायती महारानी र ९९ वर्षीय प्रिन्स फिलिपले लगाए कोभिड खोप
बेलायतकी महारानी एलिजावेथ द्वीतीयाले पनि कोभिड खोप लगाएकी छन् ।
९४ वर्षीया महारानी र उनका ९९ वर्षका पति प्रिन्स फिलिपले शनिबार कोभिड खोपको पहिलो डोज लिएको बकिङहम प्यालेसले जनाएको छ ।
लकडाउनका बेला महारानी दम्पति बस्दै आएको ’विन्डसोर क्यासल’ मै उनीहरुले खोप लिएको जनाइएको छ ।
बेलायतमा कोभिडविरुद्धको खोप गत महिनादेखि नै वितरण शुरु गरिएपनि महारानी र प्रिन्स फिलिपले आफ्नो पालो पर्खिएरै खोप लगाएका हुन् । खोपका लागि बेलायत सरकारले निर्धारण गरेको प्राथमिकताअनुसार ८० वर्षमाथिको उमेर समूहको पालोमा उनीहरुले खोप लिएका हुन् ।
सामन्यत: बेलायतमा राजापरिवारका सदस्यहरुको स्वास्थ्य अवस्थाबारे कुनै सुचना सार्वजनिक गर्ने प्रचलन छैन । तर कोभिड खोपका विषयमा सर्वसाधारणमा कुनै आशंका र अन्योल बाँकी नरहोस् भन्ने उद्धेश्यले महारानी आफैले खोप लगाएको सूचना सार्वजनिक गर्न चाहेको बकिङहम प्यालेसले जनाएको छ ।
फाइजर-बायोनटेक र अक्सफोर्ड-एक्सट्राजेनेका खोपको आम रुपमा वितरण शुरु गरिसकेको बेलायतमा हालसम्म १५ लाख बढीले कोभिड खोपको पहिलो डोज लिइसकेका छन् ।
