अमेरिकी राजनीतिमा महत्वपूर्ण आगामी ४ दिन: सिनेटमा बहुमतको टुंगोदेखि राष्ट्रपतिको घोषणासम्म
प्रकाशित मिति : पुस १९, २०७७ आईतबार
अमेरिकाको राजनीतिमा यो साता निकै महत्वपूर्ण हुने भएको छ । ११७ औं संसदको सुरुवातदेखि सिनेटमा कुन दलको बहुमत हुने भन्नेकुराको निर्धारणमात्र होइन संसदबाट नवनिर्वाचित अमेरिकी राष्ट्रपतिको औपचारिक घोषणा पनि यसै साता हुनेछ ।
आइतबार दिउसोसम्म अमेरिकाको ११७ औं संसदका सदस्यहरुले आफ्नो पदभार ग्रहण गर्नेछन् । भने आइतबारै प्रतिनिधिसभामा सभामुखको निर्वाचन हुने भएको छ ।
सोमबार अमेरिकी राष्ट्रपति डोनाल्ड ट्रम्प र नवनिर्वाचित राष्ट्रपति जो बाइडेन जर्जियाको चुनावमा भोट माग्न जाने भएका छन् । ट्रम्प डाल्टनमा जानेछन् भने बाइडेन एटलान्टामा जानेछन् । मंगलबार हुने चुनावको पूर्वसन्ध्यामा चुनावी अभियानको अन्तिम प्रयास स्वरुप ट्रम्प र बाइडेन जर्जिया जाने भएका हुन् ।
सोमबार नै अमेरिकामा कोरोनाबिरुद्धको फाइजरको भ्याक्सिनको पहिलो डोज लगाएकाहरुका लागि दोश्रो डोज लगाउने मिति हो । अमेरिकामा अहिलेसम्म झण्डै ४२ लाखले कोरोनाबिरुद्धको भ्याक्सिनको पहिलो डोज प्राप्त गरिसकेका छन् । एक करोड ३० लाख डोज विभिन्न स्थानमा डेलिभर भइसकेको छ ।
मंगलबार जर्जियामा हुने चुनावले अमेरिकी सिनेटमा कुन दलको बहुमत कायम हुने भन्ने कुराको निर्धारण गर्नेछ । चुनावमा रिपब्लिकन उम्मेदवारहरु डेभिड पर्डयु र केली लोफ्लर मैदानमा रहेका छन् । त्यस्तै डेमोक्रेटिक उम्मेदवारहरुमा जोन ओसफ र राफल वार्नक मैदानमा छन् ।
सिनेटमा अहिले ४८ सिट डेमोक्रेटिक पार्टीले र ५० सिट रिपब्लिकन पार्टीले जीतेका छन् । जर्जिया दुबै सिट डेमोक्रेटिक पार्टीका उम्मेदबारले जीतेमा उपराष्ट्रपतिले गर्ने टाइब्रेक मतका आधारमा सिनेटमा डेमोक्रेटिक पार्टीको नियन्त्रण हुनेछ ।
बुधबार संसदको संयुक्त सदनले राष्ट्रपतिका लागि प्राप्त इलेक्टोरल मतहरु औपचारिक रुपमा गणना गरेर औपचारिक रुपमा निर्वाचित अमेरिकी राष्ट्रपतिको घोषणा गर्नेछ । माइक पेन्सको अध्यक्षतामा यो काम हुनेछ । पेन्सले अल्फावेटिकल अर्डरमा राज्यका प्रमाणपत्रहरु खोल्नेछन् । र, चारजना गणकहरु समक्ष पेश गर्नेछन् । ४ जना गणकहरु दुईजना हाउसबाट र दुईजना सिनेटबाट हुनेछन् । बाइडेनले २७० इलेक्टोरल मत प्राप्त गर्नासाथ पेन्सले विजेता घोषणा गर्नेछन् ।
यो प्रकृया संघीय कानुनले तोके अनुशार हुनेछ । च्याम्बरमा स्पीकरको कुर्सीमा माइक पेन्स बस्नेछन्, न्यान्सी पेलोसी बायातिर बस्नेछिन् भने ४ जना गणकहरु क्लर्कको डेस्कमा बस्नेछन् । संसदको यो संयुक्त सेसन गणना पूरा नहँदासम्म र परिणाम सार्वजनिक नगर्दासम्म जारी रहन्छ । चुनावको परिणाम घोषणा गरेपछि जनवरी २० मा सपथग्रहणको कार्यक्रममात्र बाँकी रहन्छ ।