आजदेखि ११७ औं संसदः महिला, अल्पसंख्यक र समलिंगीको सहभागितामा इतिहासकै विविध
प्रकाशित मिति : पुस १९, २०७७ आईतबार
आजदेखि अमेरिकाको ११७ औं संसद सुरु हुँदैछ । यो संसद महिला, अल्पसंख्यक र समलिंगी तथा तेश्रो लिंगीहरुको सहभागिताका सन्दर्भमा इतिहासमा नै सबैभन्दा धेरै विविध संसद हुने भएको छ । संसदको तल्लो सदन प्रतिनिधिसभामा निर्वाचित हुने रिपब्लिकन महिला सांसदको संख्याले पनि रेकर्ड ब्रेक गरेको छ ।
संसदमा यसपटक पहिलोको रेकर्ड समेत धेरैले कायम गरेका छन् । वासिंटन राज्यबाट प्रतिनिधिसभामा पहिलोपटक अश्वेत महिला निर्वाचित भएकी छिन् भने वायोमिंगबाट पहिलोपटक महिला सिनेटरले प्रतिनिधित्व गर्दैछिन् । त्यस्तै ओक्लोहोमाबाट पहिलोपटक इरानियन अमेरिकन सांसद निर्वाचित भएकी छिन् ।
नोभेम्बर ३ मा सिनेटरका लागि एकसयमध्ये ३५ सिटमा निर्वाचन भएको थियो भने प्रतिनिधिसभाका सबै सिटमा निर्वाचन भएको थियो । निर्वाचित सांसदहरुले आज सपथग्रहण गर्दैछन् भने प्रतिनिधिसभामा सभामुखका लागि निर्वाचन समेत हुने भएको छ । नयाँ संसदको सुरुवातको मिति संविधानले नै तय गरेको छ ।
सिनेट र प्रतिनिधिसभामा केही सिटहरु भने अझै पूर्ति हुन बाँकी रहेको छ । जनवरी ५ मा जर्जियामा हुने निर्वाचनले २ जना सिनेटरको संख्या पूर्ति गर्नेछ । नोभेम्बर ३ को चुनावपछि सिनेटमा ४८ जना डेमोक्र्याट्स र ५० जना रिपब्लिकन सांसद रहेका छन् । त्यस्तै प्रतिनिधिसभामा न्युयोर्कको २२ औं डिस्ट्रिक्टबाट सांसदको संख्या पूर्ति हुन बाँकी रहेको छ । मतान्तर निकै कम भएपछि त्यहाँ अदालतले पुन मतगणनाको आदेश दिएको छ । त्यस्तै आयोवाको सेकेण्ड डिस्ट्रिक्टमा पनि झिनो मतान्तर रहेपछि विवाद रहेको छ ।
आज प्रतिनिधिसभामा नवनिर्वाचितहरुको सपथग्रहण र सभामुखका लागि चुनाव विभिन्न सात समुहमा हुने भएको छ । प्रतिनिधिसभाका नवनिर्वाचितहरुमा केही पूराना अनुहारहरु रहेका छन् भने केही नयाँ अनुहारहरु थपिएका छन् । डेमोक्र्याट्सको सिट संख्या २३३ बाट घटेर २२२ मा झरेको छ ।
प्रतिनिधिसभामा बहुमतका लागि २१८ सिट आवश्यक पर्नेमा डेमोक्रेटिक सांसदहरु २२२ जना रहेको र त्यसमा पनि २ जना अनुपस्थीत रहने भएकाले सभामुख चयनमा मतदान कसिलो हुने देखिएको छ । सबै मत प्राप्त भएमा न्यान्सी पेलोसीले २२० मत प्राप्त गर्नेछिन् ।
दुईजना डेमोक्रेटिक सांसदहरु कोरोना संक्रमणका कारण उक्त प्रकृयामा सहभागी हुन नसक्ने भएकाले झिनो बहुमतले सभामुखको चयन हुने देखिएको छ ।सम्भवत सभामुख पदमा पेलोसीको आगामी कार्यकाल नै उनको अन्तिम कार्यकाल हुनेछ । पेलोसीले आफू निर्वाचित हुनका लागि मतको अभाव नहुने दृढता व्यक्त गरिसकेकी छिन् । सबै ठीकठाक नै हुने उनले बताएकी छिन् ।
बैठकमा उपस्थीत हुन नसक्नेहरुले घरबाटै मतदान गर्न पाउने प्रोक्सी मतदानको व्यवस्था समाप्त भइसकेकाले नयाँ संसदमा यस्तो व्यवस्था गर्नका लागि पुन मतदान हुनुपर्नेछ । नयाँ प्रतिनिधिसभाले यस्तो व्यवस्थाका लागि मतदान गर्ने भएकाले आइतबार उपस्थीत हुन नसक्नेहरुले सभामुख चयनमा सहभागी हुन पाउनेछैनन् ।
आजको प्रकृयापछि सिनेट र प्रतिनिधिसभाका सदस्यहरु जनवरी ६ मा भेट्ने छन् । जनवरी ६ मा संसदको संयुक्त सदनले राष्ट्रपतिका लागि इलेक्टोरल मतहरु औपचारिक रुपमा गणना गर्नेछ । माइक पेन्सको अध्यक्षतामा यो काम हुनेछ । पेन्सले अल्फावेटिकल अर्डरमा राज्यका प्रमाणपत्रहरु खोल्नेछन् । र, चारजना गणकहरु समक्ष पेश गर्नेछन् । ४ जना गणकहरु दुईजना हाउसबाट र दुईजना सिनेटबाट हुनेछन् । बाइडेनले २७० इलेक्टोरल मत प्राप्त गर्नासाथ पेन्सले विजेता घोषणा गर्नेछन् ।
यो प्रकृया संघीय कानुनले तोके अनुशार हुनेछ । च्याम्बरमा स्पीकरको कुर्सीमा माइक पेन्स बस्नेछन्, न्यान्सी पेलोसी बायातिर बस्नेछिन् भने ४ जना गणकहरु क्लर्कको डेस्कमा बस्नेछन् । संसदको यो संयुक्त सेसन गणना पूरा नहँदासम्म र परिणाम सार्वजनिक नगर्दासम्म जारी रहन्छ । चुनावको परिणाम घोषणा गरेपछि जनवरी २० मा सपथग्रहणको कार्यक्रममात्र बाँकी रहन्छ ।
इलेक्टोरल मत गणनाको बेलामा संसदमा कुनै पनि बहस र विवादलाई स्थान दिइदैन । तर परिणाम घोषणा गरिएपछि संसदका सदस्यहरुले आफ्नो भनाई राख्न सक्छन् । कुनै पनि राज्यको परिणामबारेको कुनै असहमति भएमा कम्तीमा एकजना सिनेटर र एकजना प्रतिनिधिसभा सदस्यले हस्ताक्षर गरेर लिखित रुपमा पेश गर्नुपर्छ । हरेक सांसदले एकपटकमात्र बोल्न पाउँछन् भने ५ मिनेटमा आफ्नो भनाई सक्नुपर्छ । २ घण्टापछि बहस समाप्त हुन्छ ।