देशभर कांग्रेसको शक्ति प्रर्दशन, सरकार सहि बाटोमा नहिँडे सडकबाटै ठेगान लगाउने चेतावनी
प्रकाशित मिति : मंसिर २९, २०७७ सोमबार
प्रमुख प्रतिपक्ष दल नेपाली कांग्रेसले सरकारविरुद्ध देशभर प्रदर्शन गरेको छ । कांग्रेसले सरकार सर्वसत्तावादको बाटोमा गएको, वरिष्ठ नेता रामचन्द्र पौडेलमाथि तनहुँमा प्रशासन र नेकपाले गरेको अवरोध, भ्रष्टाचार बढेको र कोरोना नियन्त्रण गर्न सरकार असफल रहेकोमा विरोध प्रदर्शन गर्न लागेको हो । कांग्रेसले अब सरकार ठीक बाटोमा नहिँडे सडकबाटै ठेगान लगाउने चेतावनी दिएको छ ।
नेपाली कांग्रेसका सभापति शेरबहादुर देउवाले प्रधानमन्त्री केपी शर्मा ओली नेतृत्वको सरकारकै कारण राजावादी सडकमा आएको बताएका छन् । उनले राजावादीहरुको आन्दोलनका लागि ओली सरकार नै जिम्मेवार रहेको आरोप लगाए । ‘अहिले राजा आउ देश बचाउ भन्दै सडकमा हिँडेको देखिन्छ । देउवाले भने, त्यो कम्युनिस्ट सरकार र ओलीकै कारण भएको हो ।’
मकवानपुरको हेटौंडामा विरोध प्रदर्शनपछि आयोजित कोणसभालाई सम्बोधन गर्दै देउवाले कम्युनिष्ट सरकारबाट जनता वाक्क दिक्क भएको कारण देशभर आन्दोलन गर्न बाध्य भएको बताएका छन् । उनले सडक जाम गरेर, पसल बन्द गराएर यसरी विरोध गर्न रहर नभएको भन्दै सरकारका कामले जनता आजित भएको बताए ।
यस्तै कांग्रेसका वरिष्ठ नेता रामचन्द्र पौडेलले वर्तमान सरकार लिप्त रहेको आरोप लगाएका छन् । राजधानीको शान्ति वाटिकावाट सम्बोधन गर्दै पौडेलले प्रधानमन्त्री केपी शर्मा ओली नेतृत्वको सरकार भ्रष्टाचारमा डुबिसकेको बताएका हुन् । ‘यो सरकार भ्रष्टचारमा डबिसकेको छ’ उनले भने,‘कम्युनिस्ट अधिनायकवादी सर्वसत्तावादमा भ्रष्टाचार मात्र देखिएको छ । कम्युनिष्ट पार्टीका नेताहरूले भनिसके, सचिवालयका बहुमत नेताले भनेका छन् – यो सरकार भ्रष्टाचारी हो ।’
नेपाली काङ्ग्रेसका पूर्व सहमहामन्त्री तथा केन्द्रीय सदस्य डा. रामशरण महतले नेकपाका कारण मुलुकमा विकृति भित्रिएको बताएका छन् । चितवनमा आयोजित सरकारविरुद्धको सभामा बोल्दै नेता महतले संसारबाट बिदा भइसकेको कम्युनिस्टहरूले नेपालमा जितेर विकृति, विसङ्गति भित्र्याएको जिकिर गरे । “नेपाल कम्युनिस्ट पार्टीको सरकार छ । कम्युनिस्टहरू संसारबाट बिदा भइसकेका छन् । यो मृत्यु भइसकेको दर्शन हो । चीन, उत्तर कोरियाबाहेक अन्य मुलुक कम्युनिस्टहरूले जितेका छैनन्,” उनले भने, “कम्युनिस्ट पार्टीको नाममा पार्टी खोलेको छ, कहीँ पनि जितेको छैन । मतदाताहरूलाई भ्रममा पारेर झुक्याएर जितेका हुन् ।”
त्यसैगरि कांग्रेसका प्रवक्ता विश्वप्रकाश शर्माले देशव्यापी महामारीको रुपमा फैलिएको कोरोना भाइसले मारमा परेको बेला सरकार सत्तामा र भ्रष्टाचारमा लिप्त रहेको बताएका छन् । तनहुँ पुल प्रकरणको कुरालाई जोड्दै उनले कांग्रेसको एउटामात्र कार्यकर्तालाई जिस्काउनु भनेको सुतेको बाघलाई जिस्काउनु रहेको बताउँदै होसिरयार, रहन आग्रह गरेका छन् ।
सरकारविरूद्ध देशव्यापी प्रदर्शनका क्रममा हेटौंडामा आयोजित सभालाई सम्बोधन गर्न पुगेका शर्माले अबको निर्वाचनमा कांग्रेस बहुमतसहित सरकारमा जाने बताए । शर्माले सरकारलाई सच्चाउन सडकमा आएको बताए । उनले धनमाया गुरूङजस्ता पात्रहरूले किन उपचार पाएनन् भनेर जवाफ खोज्न सडकमा आएको बताए । सूर्यबहादुर तामाङहरू सडकमा किन मर्नुप¥यो ? उनलाई प्रधानमन्त्री केपी शर्मा ओलीले चिन्छन् कि चिन्दैनन् भनेर बुझ्न सडकमा आएको पनि बताए ।
यस्तै कांग्रेसका युवा नेता गगन थापाले बालुवाटारको दुलोभित्र लुकेर षडयन्त्रमा रहेको सरकार ठेगानमा नआएसम्म सडकमै आन्दोलन गर्ने चेतावनी दिएका छन् । उनले भने ’सरकार संसदबाट भाग्यो । बालुवाटारभित्र बसेर षडयन्त्र गरेको सरकारलाई ठेगानमा ल्याउन सडकमा आएका हौं । सरकार ठेगानमा नआएसम्म अब फर्केर यसै जाँदैनौं ।’
धनगढीमा भएको विरोध प्रदर्शनमा सम्बोधन गर्दै नेता थापाले कोरोना महामारी नियन्त्रणमा नआउँदै सडकमा आउन बाध्य भएको बताए । ‘कोरोना महामारी नियन्त्रणमा आउन सकेको छैन्, थापाले भने, अगाडीका दिनहरु कस्ता आउँछन् भन्न सक्ने अवस्था छैन् । तर पनि सडकमा आउन बाध्य भयौं’
थापाले थापाले सरकारलाई हावादारीको संज्ञा दिँदै भ्रष्टाचारीहरुलाई प्रधानमन्त्री केपी शर्मा ओलीले नै संरक्षण गरेको आरोप लगाए । ‘‘नेपाल सरकार संलग्न भएर भएको एउटा पनि भ्रष्टाचारको काण्ड प्रधानमन्त्रीको संरक्षण विना भएको छैन’ । कांग्रेस नेता थापाले भने, भ्रष्टाचारी खोज्न कहीँ जानु पर्दैन । बालुवाटार गए पुग्छ, सिंहदरबार गए पुग्छ ।’
भैरहवामा आयोजित कार्यक्रममा नेपाली कांग्रेसका केन्द्रिय सदस्य सुरेन्द्र पाण्डेले प्रधानमन्त्री केपी शर्मा ओली भ्रष्टाचारीहरुको नाईके भएको आरोप लगाए । ओली आफै भ्रष्टाचारमा संलग्न रहेको कारण भ्रष्टाचारीहरुलाई संरक्षण गरेको उनले आरोप लगाए । “तपाई भ्रष्टाचार निर्मूल गर्न चाहनुहुन्छ भने कुनै आम टेपले बोलेको छ, प्रिन्टिङ्ग प्रेसमा २५ अर्व भन्दा बढी भ्रष्टाचार भएको छ तर तपाईल आफ्ना कनिष्ट पुत्र गोकुल बास्कोटालाई किन कारवाहीको कठघरामा उभ्याउन सक्नु भएन हामीले प्रश्न गर्ने कि नगर्ने कि तपाई पनि भ्रष्टाचारमा संलग्न हुनुहुन्न ।” पाण्डेले भने ।